Ўзбекистонда риэлторлар фаолиятини тартибга солувчи қонун қабул қилинди

Ўзбекистонда риэлторлик фаолиятини тартибга солувчи янги қонун қабул қилинди. Қонунга кўра, риэлтор энди фақат риэлторлик ташкилоти таркибида ишлаши ва малака сертификатига эга бўлиши керак. Сертификат олиш учун талабгор махсус ўқув дастурини тугатиб, малака имтиҳонини муваффақиятли топшириши лозим.

Малака сертификати профессионал жамоат бирлашмаси томонидан электрон шаклда берилади. У дастлаб беш йил амал қилади ва малака имтиҳони топширилганидан сўнг яна беш йилга узайтирилиши мумкин.

Халқаро тан олинган риэлторлик малака сертификатига эга шахсларга эса миллий сертификат имтиҳонсиз берилади. Бунда ҳам сертификат дастлаб беш йил муддатга расмийлаштирилади.

Ташкилотларга талаблар кучайди

Риэлторлик ташкилоти ва кўчмас мулк бўйича агент фақат маълумотлари Ягона реестрга киритилганидан кейин ишлаши мумкин. Реестрни соҳада ваколатли давлат органи бўлган Давлат активларини бошқариш агентлиги юритади.

Ташкилот раҳбари малака сертификатига эга бўлиши, штатда эса камида икки нафар сертификатли риэлтор ишлаши шарт. Бир риэлтор фақат битта ташкилотда фаолият юритиши мумкин.

Ташкилот профессионал жамоат бирлашмаларидан бирига аъзо бўлиши, риэлторларининг ҳар йили малака оширишини таъминлаши ва фуқаролик жавобгарлигини суғурталаши керак.

Давлат органлари риэлторлик ташкилотини тузиши мумкин эмас. Ташкилотга бошқа фаолият билан шуғулланиш ва кўчмас мулк битимида бевосита тараф бўлиш ҳам тақиқланади.

Мижоз ҳуқуқлари ҳимоя қилинади

Янги тартиб риэлторнинг мижоз олдидаги мажбуриятларини ҳам белгилади. У кўчмас мулк, унга бўлган ҳуқуқлар ва мулкдор ҳақида ишончли ҳамда тўлиқ ахборот бериши шарт.

Риэлтор мижознинг ёзма мурожаатига жавоб бериши, хизмат давомида олинган махфий маълумотларни ошкор қилмаслиги ва ҳужжатларнинг сақланишини таъминлаши керак.

Қонун риэлторларга кўчмас мулк битимларида воситачилик қилиш, савдони ташкил этиш, обектларни ишончли бошқариш, шунингдек ахборот, маслаҳат ва реклама хизматларини кўрсатиш имконини беради.

Хусусий секторда «мултлистинг» тизимини жорий этиш ҳам назарда тутилган.

Қонун расмий эълон қилинган кундан уч ой ўтиб, 8-ноябрдан кучга киради.