Қозоғистон халқ ёзувчиси Мухтор Шохонов вафот этди
Афсонавий қозоқ адиби ва шоири бутун бир миллатга Наврўз байрамини қайтариб берган ва тарихий адолат учун курашган эди.
© Оспан АлиҚозоғистоннинг атоқли ёзувчиси, шоир ва йирик жамоат арбоби Мухтор Шохонов 83 ёшида оламдан ўтди. Бу ҳақда Қозоғистон Маданият ва ахборот вазирлиги расман хабар бериб, марҳумнинг оила аъзолари ва яқинларига чуқур ҳамдардлик билдирди.
Вазирлик ўз баёнотида Мухтор Шохоновнинг ижоди ва фуқаролик позициясига юқори баҳо берган:
«У мураккаб ижтимоий масалаларга доим ҳозиржавоб бўлган, мамлакат ва ер тақдири ҳақида теран фикрларни илгари суриб, ўзигагина хос бўлган юксак фуқаролик позициясини намоён этган. Мухтор Шохоновнинг жасур характери, адолат йўлидаги матонати ва миллий манфаатларга садоқати халқ хотирасида абадий қолади».
Тарихий хизматлари
1942 йил 2 июлда таваллуд топган Мухтор Шохонов ўз ҳаёти давомида нафақат адабиёт, балки сиёсат ва жамият ҳаётида ҳам ўчмас из қолдирди. У 1989 йилдан СССР Олий Кенгаши, 1991 йилдан эса Қозоғистон Олий Кенгаши депутати сифатида фаолият юритган. Шунингдек, Қозоғистоннинг Қирғизистондаги элчиси лавозимида ҳам ишлаган.
Ёзувчининг энг катта тарихий хизматларидан бири — 1989 йилда унинг бевосита раҳбарлигида 1986 йилги Олмаота воқеаларини (декабр воқеалари) тергов қилиш бўйича махсус комиссия тузилганидир. Ушбу комиссия воқеаларни холисона кўриб чиқишни ва ноҳақ судланган ёшларни оқлашни қатъий талаб қилган эди.
Бундан ташқари, айнан Мухтор Шохоновнинг 1988 йилдаги шахсий ташаббуси ва саъй-ҳаракатлари билан минтақада Наврўз байрамини нишонлаш анъанаси қайта тикланган.
Мухтор Шохонов кўп йиллик самарали меҳнати учун «Қозоғистон Меҳнат Қаҳрамони» унвони ва республика халқ ёзувчиси мақоми билан тақдирланган эди. Унинг вафоти бутун туркий дунё адабиёти ва маданияти учун улкан йўқотишдир.
