«Рақамли қаршиликка хуш келибсиз». Павел Дуров Россияда Телеграмнинг блокланишига изоҳ берди

«Telegram» асосчиси Павел Дуров Россияда мессенжерни блоклашга бўлган уринишларга изоҳ берди. Унинг баёнотида Россия ҳукумати илгари ҳам «Telegram»ни тақиқлашга урингани ва VPN хизматларини тақиқлаш учун йиллаб вақт сарфлагани ҳақида айтилган.

Дуровнинг ёзишича, «65 миллион россиялик ҳамон ҳар куни VPN орқали «Telegram»дан фойдаланмоқда, шу билан бирга 50 миллиондан ортиғи ҳар куни хабарлар юбормоқда».

«Блоклаш уринишлари ҳозиргина оммавий банк тизимидаги носозликларни келтириб чиқарди — кеча бутун мамлакат бўйлаб нақд пул қисқа вақт ичида ягона тўлов усулига айланиб қолди», — деди Дуров.

Эрон тажрибаси

У Эрон бир неча йил олдин «Telegram»ни тақиқлаганини эслатиб ўтди. Дуровнинг сўзларига кўра, натижа Россиядаги билан бир хил бўлган — «ҳукумат кузатув мақсадида ўз мессенжерлари оммалашишига умид қилган, лекин бунинг ўрнига VPNнинг оммавий қўлланишига эришган».

«Рақамли қаршиликка қайта хуш келибсиз, менинг россиялик биродарларим ва опа-сингилларим. Ҳозир бутун мамлакат ушбу бемаъни чекловларни четлаб ўтиш учун сафарбар бўлган. Минглаб одамлар VPN ва прокси-серверлар яратмоқда», — деб ёзди Дуров ва «Эрондаги 50 миллион рақамли қаршилик аъзоларига Россиядаги 50 миллиондан ортиқ киши қўшилганини» таъкидлади.

«Telegram» жамоаси, ўз навбатида, «трафикни аниқлаш ва блоклашни қийинлаштириш орқали мослашишда давом этишга» ваъда берди.

«Telegram»нинг блокланиши

Феврал охирида бир нечта Россия ОАВлари ҳукумат «Telegram»ни 1 апрелга қадар тўлиқ блокламоқчи эканлиги ҳақида хабар берган эди. Бу амалга ошмади, лекин Россиядаги кўплаб фойдаланувчиларда мессенжер март ойидаёқ VPNсиз ишламай қолди. Рақамли ривожланиш вазирлиги уларнинг олдига Россияда VPNдан фойдаланишни камайтириш вазифаси қўйилганини маълум қилди.

Март ойи бошида «Forbes» нашри «Okkam»нинг «Mediascope» маълумотларига асосланган ҳисоб-китобларига таяниб, 2026 йил январ ойида «Telegram»га кирган фойдаланувчилар сони деярли 96 миллион кишини ташкил этганини ёзган эди. Нашрнинг таъкидлашича, ушбу кўрсаткич бўйича «Telegram» Россиядаги энг оммабоп мессенжер бўлган.