Урганч аэропортидан Хивага тезюрар электропоезд қатнови йўлга қўйилди

Урганч аэропортидан Хива шаҳригача замонавий электропоезд қатнови йўлга қўйилди. Бу ҳақда «Ўзбекистон темир йўллари» компанияси маълум қилди.

Янги «Урганч Аэровокзал – Хива – Урганч Аэровокзал» йўналишида Хитой Халқ Республикасининг «CRRC Dalian Co., Ltd.» компанияси томонидан ишлаб чиқарилган «CR200J» русумли замонавий тезюрар электропоезд қатнамоқда.

Мазкур электропоезд жами 6 та вагондан иборат бўлиб, бир вақтнинг ўзида 415 нафар йўловчига мўлжалланган. Поезднинг ҳаракат тезлиги соатига 160 километрни ташкил этади.

Замонавий қулайликлар ва қатнов жадвали

Қайд этилишича, электропоездда йўловчилар учун «Econom» тоифасидаги замонавий ва қулай ўриндиқлар ўрнатилган.

«Ҳар бир ўриндиқда USB қувватлантириш қурилмалари, вагон ичидаги иқлимни меъёрида сақлаш имконини берувчи иқлим назорати тизими мавжуд. Шунингдек, ногиронлиги бўлган йўловчилар учун махсус жойлар кўзда тутилган», — дейилади хабарда.

Расмий хабарга кўра, поездлар ҳаракати қуйидаги жадвал асосида амалга оширилади:

• 7055-сонли «Урганч Аэровокзал – Хива» йўналиши бўйича поезд Урганч аэровокзалидан соат 08:40 да жўнаб кетади. Соат 08:59 дан 09:02 гача Урганч бекатида тўхтаб ўтади ва 09:22 да Хивага етиб боради.

• 7058-сонли «Хива – Урганч Аэровокзал» қатнови эса Хивадан соат 21:00 да йўлга чиқиб, 21:20–21:23 оралиғида Урганчда тўхтайди ва 21:42 да Урганч аэровокзалига етиб келади.

Йўналиш бўйича чипта нархлари катталар учун 25 000 сўм, болалар учун эса 14 000 сўм этиб белгиланган.