Xitoyda oltin bozoridagi havolash va chakana bozorga keskin cheklov

13-fevral kuni Xitoyning bir qator shahar idoralari «noqonuniy oltin savdosi»ni to‘xtatish talabi bilan qo‘shma bayonot e’lon qildi. Unda chakana investorlarga yelka bilan savdo taklif qiluvchi ilovalar, onlayn-translyatsiya orqali agressiv reklama va kompaniyalarning o‘zini Shanghay oltin birjasi a’zosi sifatida ko‘rsatishi taqiqlandi. Bu haqda «Bloomberg» xabar berdi.

Rasmiylar, shuningdek, ayrim platformalar quymalarni sof oltin sifatida sotish yoki qimmatbaho metallarning nomi bilan chalg‘itish holatlariga chek qo‘yilishini bildirdi. Reklamada «oltin narxi uchadi» yoki «oltindan boyib ket» kabi chaqiriqlar ham man etildi.

Choralar bozordagi yuqori talab va spekulyativ faollik fonida joriy etildi. Xitoyda xususiy investorlardan tortib yirik fondlargacha bo‘lgan xaridorlar oqimi narxlarni tarixiy maksimumlargacha ko‘tardi.

Talab va xavflar

Oy oxirida keskin tushish kuzatilganiga qaramay, treyderlar fikricha, chakana talab hanuz yuqori. Xususan, oltin ETFʼlariga rekord miqdorda mablag‘ kiritilgan. Mamlakatdagi yagona kumush fondi atrofida ham qizg‘in qiziqish shakllangan.

Asosiy faollik Shenjen shahridagi Shuybey zargarlik hududida jamlangan. Ilgari baliqchilar qishlog‘i bo‘lgan bu hudud bugun Xitoy oltin savdosining markaziga aylangan.

Chakana ajiotaj ayrim hollarda tartibsizliklarga sabab bo‘ldi. Shenjenda «Jie Wo Rui» onlayn platformasi orqali oltin xarid qilgan mijozlar mablag‘larini qaytarib ololmaganidan so‘ng norozilik namoyishlari o‘tkazgan. Shundan keyin mahalliy hokimiyat platforma faoliyatini monitoring qilish uchun maxsus ishchi guruh tuzdi.

Birja qoidalari o‘zgardi

Spekulyatsiyalar kumush bozoriga ham ta’sir qildi. Taklif taqchilligi sabab Shanghay fyuchers birjasida yaqin muddatli kontraktlar uzoq muddatlilardan ancha qimmat savdolandi. Ombor zaxiralari esa so‘nggi o‘n yillikdagi eng past darajaga tushdi.

Shu sharoitda Shanghay fyuchers birjasi ayrim kompaniyalarga maxsus hej kvotasisiz kumush fyucherslarini jismoniy yetkazib berishga olib chiqishni taqiqladi. Bu chora omborlardan metall chiqib ketishini cheklashga qaratilgan.