115-сонли автобус йўналиши узайтирилди
Тошкентда 115-сонли автобус йўналиши 4 декабрдан Ғишт завод бекатигача узайтирилди.
Тошкент шаҳрида жамоат транспорти инфратузилмаси такомиллаштирилиши доирасида 115-сонли «ТошГРЭС маъмурий биноси — Гулобод кўчаси» автобус йўналиши 2025 йил 4 декабрдан бошлаб Ғишт завод бекатигача узайтирилди.
Мазкур қарор 2025 йил 9 июл куни ўтказилган видеоселектор йиғилишида берилган топшириқларни амалга ошириш йўналишида қабул қилинди. Йўналишни узайтириш орқали Тошкент вилоятининг айрим ёндош ҳудудларини пойтахт билан боғлаш, шунингдек, тирбандликларни камайтириш кўзда тутилган.
«Тошшаҳартрансхизмат» АЖ ахборот хизматига кўра, янгиланган йўналишда автобуслар 05:00 дан 23:15 гача қатнайди. Ушбу ўзгариш йўловчилар учун кун давомида барқарор ва қийинчиликсиз қатнов имконини таъминлашга қаратилган. Компанияга кўра, вақт оралиғининг узоқ белгиланиши аҳоли талаби ва ташиш ҳажмини инобатга олган ҳолда амалга оширилган.
Шу билан бирга, йўналишнинг Ғишт завод бекатигача узайтирилиши аҳоли яшаш массивлари ва муҳим ишлаб чиқариш нуқталарига жамоат транспортида тез етиб бориш имконини оширади. Янгиланган қатнов тартиби кундалик сафарларга мослаштирилган бўлиб, айниқса ишга ва ўқишга борадиган йўловчилар учун енгиллик яратиши кутилаяпти.
Транспорт тизимини такомиллаштиришга қаратилган бундай қадамлар пойтахт ва унинг атрофида юзага келаётган тирбандликларни пасайтириш, шунингдек, хусусий автомобиллардан фойдаланиш улушини камайтиришга хизмат қилади.
Эслатиб ўтамиз, 12 октябрдан бошлаб Тошкентда 197-сонли янги автобус йўналиши ишга туширилган. У пойтахт марказини «Янги Тошкент» ҳудуди билан боғлайди ва кун давомида йўловчиларга хизмат кўрсатади.
