«Brasserie Park» терассаси эгаллаган йўлак демонтаж қилинди
Пойтахт ҳокимлиги рестораннинг ёзги терассаси юзасидан текширув ўтказиб, пиёдаларнинг эркин ҳаракатланишига тўсқинлик қилган ҳолатларни аниқлади. Аввалроқ ресторан вакили ва курьер ўртасидаги жанжал акс этган видео ижтимоий тармоқларда тарқалганди.
© Toshkent shahar hokimligi matbuot xizmatiТошкент шаҳар ҳокимлиги Миробод туманидаги Мовий гумбазлар боғида жойлашган «Brasserie Park» ресторанининг ёзги терассасини демонтаж қилди.
Ҳокимлик маълумотига кўра, ҳудуддан фойдаланиш ва пиёдаларнинг эркин ҳаракатланишини таъминлаш бўйича ўтказилган текширувда қоидабузарликлар аниқланган.
Текширувлар ресторан вакили билан курьер ўртасидаги жанжал акс этган видео ижтимоий тармоқларда тарқалиб, кенг муҳокамаларга сабаб бўлганидан сўнг ўтказилган.
«Текширув якунларига кўра қоидабузарликлар аниқланиб, тегишли чоралар кўрилди. Ҳудуд қонунчилик талабларига мувофиқ ҳолга келтирилди», — дейилади ҳокимлик хабарида.
Ҳокимлик пиёдаларнинг қулайлиги ва хавфсизлиги шаҳар муҳитини ташкил этишдаги устувор йўналишлардан бири эканини таъкидлади. Шунингдек, жамоат жойлари аҳоли учун очиқ бўлиб қолиши шартлиги қайд этилди.
Курьер билан жанжал
Тошкент шаҳар ИИББ ҳам ушбу воқеа юзасидан муносабат билдирди. Маълумотларга кўра, 17-октябр куни соат 13:00 атрофида С.Р. ва вояга етмаган М.Й. ўртасида келишмовчилик юзага келган.
Ижтимоий тармоқларда тарқалган видеода ресторан вакили курьер билан тортишаётгани акс этган, бунга эса курьернинг рестораннинг пиёдалар ўтиш йўлагида жойлашган терассасидан скутер билан ўтгани сабаб бўлган. Ресторан вакили курьерга қўпол сўзлар билан скутерини етаклаб юриши кераклигини айтган, курьер эса буни тўғри тушунтириш мумкинлигини билдириб, узр сўраган.
ИИББ маълумотларига кўра, ҳолат бўйича С.Р.га нисбатан Маъмурий жавобгарлик тўғрисидаги кодекснинг 183-моддаси, яъни майда безорилик бўйича маъмурий баённома расмийлаштирилган. Ҳужжатлар кўриб чиқиш учун жиноят ишлари бўйича туман судига юборилган.
