ChatGPT'ga shaxsiy moliyani boshqarish funksiyasi qo‘shildi

OpenAI kompaniyasi ChatGPT platformasiga shaxsiy moliyani boshqarish funksiyalari integratsiya qilinganini ma’lum qildi. Yangi xizmat orqali foydalanuvchilar o‘z moliyaviy hisoblarini chat-botga ulab, daromad va xarajatlarini bir joyda kuzatishi mumkin bo‘ladi.

Hozircha mazkur funksiya AQSHdagi ayrim Pro obunachilari uchun veb-versiya va iOS tizimida sinov tartibida ishlamoqda. Kompaniya kelgusida ushbu imkoniyatni Plus obunachilari uchun ham ochishni rejalashtirgan.

Yangi moliyaviy xizmat

OpenAI ma’lumotiga ko‘ra, ChatGPT foydalanuvchi tomonidan kiritilgan maqsadlar, kundalik turmush tarzi va moliyaviy ustuvorliklar asosida tavsiyalar shakllantiradi. Foydalanuvchilar jamg‘arma rejasini tuzish, yirik sarmoyalarni baholash va xarajatlarni optimallashtirish bo‘yicha maslahatlar olishi mumkin.

Shuningdek, chat-bot daromad ssenariylarini tahlil qilish, investitsiya xatarlarini baholash va uzoq muddatli moliyaviy rejalarni shakllantirish imkoniyatlarini ham taklif etadi. Kompaniya bu funksiya professional moliyaviy maslahat o‘rnini bosmasligini alohida ta’kidlagan.

Yangi «Moliya» bo‘limida OpenAI’ning eng yangi modeli — GPT-5.5 qo‘llanilmoqda.

Xavfsizlikka urg‘u

Kompaniya ma’lum qilishicha, ChatGPT Plaid platformasi orqali 12 mingdan ortiq moliyaviy tashkilotlarni qo‘llab-quvvatlaydi. Yaqin kelajakda esa Intuit platformasi bilan ham integratsiya amalga oshirilishi rejalashtirilgan.

OpenAI kelajakda kredit karta uchun ariza yuborish yoki soliq maslahatchisi qabuliga yozilish kabi qo‘shimcha xizmatlarni ham ishga tushirishi mumkinligini bildirdi.

Kompaniya foydalanuvchilar ma’lumotlari xavfsizligi kafolatlanishini ta’kidlamoqda. ChatGPT bank hisoblaridagi mablag‘larga mustaqil kirish huquqiga ega emas va ular bilan operatsiyalarni amalga oshira olmaydi. Shuningdek, foydalanuvchilar istalgan vaqtda hisoblarini tizimdan o‘chirib tashlash imkoniyatiga ega.