Энди элчихоналар қабулига онлайн ёзилиш мумкин
Ягона портал орқали Ўзбекистоннинг хориждаги элчихоналари қабулига онлайн ёзилиш имконини берувчи янги хизмат ишга туширилди.
Хорижда яшаётган ёки вақтинча бўлиб турган Ўзбекистон фуқаролари учун янги қулайлик жорий этилди. Энди улар Ягона интерактив давлат хизматлари портали (my.gov.uz) орқали мамлакат элчихонаси ёки консуллиги қабулига олдиндан онлайн тарзда ёзилишлари мумкин. Бу ҳақда портал матбуот хизмати маълум қилди.
Хизматдан фойдаланиш учун фуқаро «Элчихона (консуллик) қабулига ёзилиш» бўлимини танлаши керак. Шундан сўнг консуллик округи ва керакли хизмат тури кўрсатилади. Кейин эса тақвим орқали қулай сана ва вақт танланиб, электрон навбат талони расмийлаштирилади.
Ушбу хизмат мутлақо бепул тақдим этилади. Бироқ порталдан фойдаланиш учун албатта авторизациядан ўтиш талаб этилади. Янги фойдаланувчилар учун рўйхатдан ўтиш жараёни ҳам соддалаштирилган.
Шу билан бирга, турли мамлакатлардаги дипломатик ваколатхоналар кўрсатадиган хизматлар турлича бўлиши мумкин. Шу сабабли фуқаролар ўзларига керакли хизмат турини танлашда эътиборли бўлишлари тавсия этилади.
Белгиланган вақтда қабулга келмаган фуқароларга хизмат умумий навбат асосида кўрсатилиши ёки қабул вақтини қайта белгилаш талаб этилиши мумкин. Шунингдек, олинган навбатни бошқа шахсга ўтказиш имконияти мавжуд эмас.
