Endi elchixonalar qabuliga onlayn yozilish mumkin
Yagona portal orqali O‘zbekistonning xorijdagi elchixonalari qabuliga onlayn yozilish imkonini beruvchi yangi xizmat ishga tushirildi.
Xorijda yashayotgan yoki vaqtincha bo‘lib turgan O‘zbekiston fuqarolari uchun yangi qulaylik joriy etildi. Endi ular Yagona interaktiv davlat xizmatlari portali (my.gov.uz) orqali mamlakat elchixonasi yoki konsulligi qabuliga oldindan onlayn tarzda yozilishlari mumkin. Bu haqda portal matbuot xizmati ma’lum qildi.
Xizmatdan foydalanish uchun fuqaro «Elchixona (konsullik) qabuliga yozilish» bo‘limini tanlashi kerak. Shundan so‘ng konsullik okrugi va kerakli xizmat turi ko‘rsatiladi. Keyin esa taqvim orqali qulay sana va vaqt tanlanib, elektron navbat taloni rasmiylashtiriladi.
Ushbu xizmat mutlaqo bepul taqdim etiladi. Biroq portaldan foydalanish uchun albatta avtorizatsiyadan o‘tish talab etiladi. Yangi foydalanuvchilar uchun ro‘yxatdan o‘tish jarayoni ham soddalashtirilgan.
Shu bilan birga, turli mamlakatlardagi diplomatik vakolatxonalar ko‘rsatadigan xizmatlar turlicha bo‘lishi mumkin. Shu sababli fuqarolar o‘zlariga kerakli xizmat turini tanlashda e’tiborli bo‘lishlari tavsiya etiladi.
Belgilangan vaqtda qabulga kelmagan fuqarolarga xizmat umumiy navbat asosida ko‘rsatilishi yoki qabul vaqtini qayta belgilash talab etilishi mumkin. Shuningdek, olingan navbatni boshqa shaxsga o‘tkazish imkoniyati mavjud emas.
