Илгиз Танташевга Жаҳон чемпионатида бошқа ўйин берилмаслиги керак — эксперт

Англия Премер-лигасининг собиқ ҳаками Кит Ҳакетт Ўзбекистонлик ҳакам Илгиз Танташевнинг Парагвай — Франция учрашувидаги ишини кескин танқид қилди. Унинг фикрича, Танташев мусобақада бошқа ўйин бошқармаслиги лозим.

«Мен ҳакам Илгиз Танташевнинг жуда ёмон ишлаганига гувоҳ бўлдим. Менимча, унга ушбу Жаҳон чемпионатида бошқа ўйин берилмаслиги керак», — деди Ҳакетт «Flashscore» порталига берган интервюсида.

Мутахассиснинг таъкидлашича, Танташев Парагвай футболчиларининг ўйин суръатини пасайтиришга қаратилган ҳаракатлари ва айрим футболчиларнинг қоидабузарликларини тўғри баҳолай олмаган.

«Жуда ёмон қарор»

Ҳакетт Франция футболчиси Бредли Барколага кўрсатилган сариқ карточкани ҳам танқид қилди.

«Вазиятдан бир неча метр узоқликда турган ҳакам франциялик Брэдли Барколага гўёки Хуан Хосе Касересга қарши қўпол ўйнагани учун сариқ карточка кўрсатди. Ваҳоланки, такрорий лавҳаларда ҳеч қандай тўқнашув бўлмагани кўринди. Бу ҳакам томонидан чиқарилган жуда ёмон қарор эди», — деди у.

Шунингдек, эксперт 34-дақиқада Килиан Мбаппе билан боғлиқ можаро вақтида ҳакам камида икки футболчини огоҳлантириши кераклигини айтди.

«Аслида, ҳакамларга бундай оммавий тўқнашувлар пайтида ўз назоратини сақлаб қолиш учун камида иккита сариқ карточка кўрсатиш тавсия этилади», — дейди мутахассис.

Унинг қўшимча қилишича, 38-дақиқада Парагвай футболчисининг Мбаппега нисбатан ҳаракати ҳам сариқ карточкага муносиб бўлган, аммо ҳакам ҳеч қандай чора кўрмаган.

Ҳакетт 68-дақиқада Франция фойдасига белгиланган пеналти ҳолатига ҳам тўхталди. Унинг таъкидлашича, дастлаб ҳакам ўйинни давом эттирган, фақат «VAR» аралашувидан кейин пеналти белгиланган.

Танташевнинг иши 1 баллга лойиқ кўрилди

Франциянинг «L’Équipe» нашри ўзбекистонлик ҳакамнинг Жаҳон чемпионатидаги ишини 10 баллдан атиги 1 балл билан баҳолади.

Нашр таҳлилчиларининг фикрича, Парагвай футболчилари томонидан вақт чўзиш ва ўйин суръатини бузишга қаратилган ҳаракатлар етарлича жазоланмаган. Бироқ қўшиб берилган вақтда (90+7-дақиқада) Майкл Олисега ўйин қоидасини бузгани учун арзимаган вазиятда сариқ карточка берилган.

«L’Équipe» таъкидлашича, ҳакамларга баҳо қўйиш амалиёти жорий этилганидан бери 1 балл бериш ҳолати жуда кам учраган.

2016 йилги Европа чемпионатидан кейин бошланган баҳолаш тизимида бундай паст баҳо аввал фақат икки марта қайд этилган.

Нашр баҳони миллий тарафкашлик сабаб эмас, балки ҳакамлик сифати, ўйин назорати ва футболчиларни жароҳатлардан ҳимоя қилиш мезонларидан келиб чиқиб қўйганини билдирди.