Жанубий Корея Марказий Осиёдан нефт импорт қилишга яқин турибди
Яқин Шарқдаги геосиёсий кескинлик ва Ҳўрмуз бўғози атрофидаги хавотирлар ортиб бораётган бир пайтда, Жанубий Корея энергия хавфсизлигини таъминлаш учун энергия манбаларини диверсификация қилишга интилмоқда.
© Wealth ProfessionalЖанубий Корея Қозоғистондан нефт хомашёсини етказиб бериш бўйича келишувга яқин турибди. Бу ҳақда Жанубий Корея саноат вазири Ким Жунг-Кван маҳаллий «KBS» телеканалига берган интервюсида маълум қилди.
Унинг сўзларига кўра, музокараларда сезиларли ютуқларга эришилган ва аниқ ҳажм ҳамда шартлар келаси ҳафта бошида эълон қилиниши мумкин. Бу қадам Яқин Шарқдаги уруш фонида энергия манбаларини диверсификация қилишга қаратилган.
Шу ой бошида президент аппарати раҳбари Канг Ҳун-сик ваноат вазири билан бирга Қозоғистонга ташриф буюриб, Ҳўрмуз бўғози орқали юк ташишдаги узилишлар сабаб нефт ва нафта таъминотини таъминлаш масалаларини муҳокама қилган.
Вазирнинг таъкидлашича, Қозоғистон узоқ кўринса-да, у ердан нефт етказиб бериш вақти АҚШдан келадиган юклар билан деярли бир хил – тахминан 50–60 кунни ташкил қилади.
Маълумотларга кўра, Жанубий Корея энергия бўйича деярли тўлиқ импортга боғлиқ бўлиб, нефт харидининг 70 фоизи Яқин Шарқ ҳиссасига тўғри келади. Шунингдек, мамлакат ўтган ой Бирлашган Араб Амирликларидан 24 миллион баррель нефть етказиб бериш бўйича ҳам келишув олган.
Қозоғистон нефти ва тенге
Яқин Шарқда уруш бошланиши ва Ҳўрмуз бўғозининг ёпилиши ортидан нефт нархи жуда беқарор бўлиб қолмоқда. Шу шароитда «Deutsche Bank» тенгени капитални сақлаш учун жозибадор валюта деб атади. Банк Яқин Шарқдан нефт ва газ таъминотидаги узилишлар ҳамда нефт нархининг ўсиши Қозоғистоннинг жорий ҳисобига дарҳол ижобий таъсир кўрсатмоқда, деб ҳисобламоқда. Қиммат нефт миллий валютанинг мустаҳкамланишига олиб келмоқда, бироқ Эрон билан боғлиқ уруш туфайли бозорлардаги ноаниқлик «асабийлик»ни кучайтирмоқда. «KASE»да Қозоғистон валютаси курсининг Эрондаги можаро бошланганидан бери 503,9 тенгедан 476,6 тенгегача ўзгаргани кузатилди, яъни фарқ 5 фоиздан ортиқни ташкил этди.
Молиявий таҳлилчи Андрей Чеботарев сўзларига кўра, нефт нархининг кескин ўзгариши, Миллий жамғарма трансфертлари ва экспортчилар валюта тушумларини сотиши тенге курсининг янада тебранишини кучайтириши мумкин.
