Канада банки Карл III портрети туширилган янги 20 долларлик банкнотни тақдим этди
Янги купюрада Канада банкнотларида аввал ҳеч қачон қўлланмаган ҳимоя технологиялари мавжуд.
© Bank of CanadaКанада банки раҳбари Тифф Маклем 3-сентябр куни Оттавада қирол Карл III тасвири туширилган янги, вертикал кўринишдаги 20 долларлик банкнотни тақдим этди. Ушбу купюра Канада тарихида Карл III портрети туширилган биринчи банкнота бўлиб, унда марҳум қиролича Елизавета II портрети ўрнини Карл III эгаллади.
Маклем матбуот анжуманида ушбу тақдимотни тарихий воқеа деб атади. Канада валютасида янги монарх тасвири пайдо бўлганига 70 йилдан ортиқ вақт ўтди. Қиролича Елизавета II илк бор 1935-йилда Канада банкининг 20 долларлик банкнотида, ҳали ёш малика бўлган пайтида тасвирланган.
Маклемнинг сўзларига кўра, янги купюрада Канада банкнотларида аввал ҳеч қачон қўлланмаган ҳимоя технологиялари мавжуд. Банкнота полимердан тайёрланган, асосан яшил рангларда ишланган ва вертикал шаклга эга. Орқа томонида Канада миллий Вими ёдгорлиги сақлаб қолинган, олд томонининг марказида эса Карл III портрети жойлаштирилган. Купюра ҳаракатлантирилганда айланадиган, шаклини ўзгартирадиган ва пульсация қиладиган элементларга эга бинафша рангли ҳимоя тасмаси билан жиҳозланган.
Банкнинг таъкидлашича, бу технология купюранинг ҳақиқийлигини текширишни осонлаштиради ва уни қалбакилаштиришни қийинлаштиради.
Молия вазири Франсуа-Филипп Шампан янги 20 долларлик банкнота Канада ўзига хослигининг муҳим жиҳатларини акс эттиришини, Миллатлар Ҳамдўстлиги билан тарихий илдизлар ва халқаро иттифоқчилар билан алоқаларни ҳурмат қилишини таъкидлади.
Янги банкнота 2027-йил феврал ойининг охиридан бошлаб босқичма-босқич муомалага киритилади. Бу Канада банкининг вертикал форматдаги сериясидаги иккинчи купюра бўлади. Биринчиси фуқаролик ҳуқуқлари учун курашган Виола Десмонд тасвири туширилган 10 долларлик банкнота эди. 20 долларлик банкнота Канада банкининг энг кўп ишлатиладиган купюраси ҳисобланади. Ҳукумат 2023-йилда Карл III тахтга ўтириши муносабати билан ўтказилган тантаналар вақтида Канада валютасидаги қиролича Елизавета II тасвирини Карл III портретига алмаштириш режасини эълон қилган эди.
