Комил Алламжонов «Дўстлик» ордени билан мукофотланди
У 2025-йил июнидан Президент администрацияси раҳбарининг маслаҳатчиси, ноябридан эса бир вақтнинг ўзида администрациянинг АҚШдаги вакили сифатида фаолият юритиб келмоқда.
Президент администрацияси раҳбарининг шартнома асосидаги маслаҳатчиси, Президенти администрациясининг АҚШдаги вакили Комил Алламжонов «Дўстлик» ордени билан тақдирланди.
Комил Алламжонов сўнгги вақтларда Ўзбекистон ва АҚШ ўртасидаги муносабатларни ривожлантиришга қаратилган ишларга ҳисса қўшиб келмоқда.
У 2025-йил июнидан Президент администрацияси раҳбарининг шартнома асосидаги маслаҳатчиси бўлиб ишлайди. Шу йил ноябридан Президент администрациясининг АҚШдаги вакили вазифасини ҳам бажариб келмоқда.
Бу даврда Тошкент ва Вашингтон ўртасидаги мулоқотлар фаоллашди. Сўнгги бир йилда Ўзбекистон ва АҚШ президентлари тўрт марта учрашди, шунингдек, бир неча бор телефон орқали гаплашди.
Икки давлат ўртасидаги иқтисодий ҳамкорлик ҳам янги босқичга чиқди. Жумладан, АҚШ–Ўзбекистон ишбилармонлик ва инвестиция кенгаши ташкил этилди.
Ўтган йили Вашингтонда, жорий йилда эса Тошкент халқаро инвестиция форуми доирасида президент Шавкат Мирзиёев АҚШнинг йирик компаниялари вакиллари билан учрашувлар ўтказди.
Шу билан бирга, ўзбекистонлик тадбиркорларнинг АҚШда бизнес юритиши учун имкониятлар кенгайтирилди.
Хусусан, 2026-йил 1-январдан Ўзбекистон резидентлари АҚШда компания очиш ёки Америка компаниялари акцияларини сотиб олиш учун мамлакатга пул ўтказишда ҳукумат рухсатини олиши шарт эмас.
АҚШ сармоядорларининг Ўзбекистонга қизиқиши ортиши билан бирга, маҳаллий бизнеснинг Америка бозоридаги фаоллиги ҳам кенгайиб бормоқда.
Шунингдек, Комил Алламжонов Жорж Вашингтон университетининг Марказий Осиё дастури бўйича махсус маслаҳатчиси ҳам ҳисобланади.
