Moody’s Ўзбекистоннинг кредит рейтингини бир поғонага оширди
Агентлик Ўзбекистоннинг узоқ муддатли кредит рейтингини «Ba3»дан «Ba2» даражасига кўтарди. Сал аввал Fitch ҳам мамлакат кредит рейтингини яхшилаган эди.
Халқаро рейтинг агентлиги Moody's Ўзбекистоннинг узоқ муддатли суверен кредит рейтингини «Ba3»дан «Ba2»гача кўтарди. Рейтинг прогнози эса «ижобий»дан «барқарор»га ўзгартирилди. Бу ҳақда агентлик расмий сайтида маълум қилинди.
Кредит рейтинги оширилиши Ўзбекистоннинг халқаро молия бозорларидаги ишончлилиги яна бир поғонага яхшиланганини англатади.
Агентликка кўра, рейтингнинг оширилишига сўнгги йилларда давлат бошқаруви ва иқтисодий сиёсат самарадорлигининг ортгани, фискал интизомнинг мустаҳкамлангани ҳамда иқтисодиётнинг ташқи хатарларга нисбатан барқарорроқ бўлгани сабаб бўлган.
Сўнгги уч йилда мамлакат иқтисодиёти ўртача 6,9 фоиз ўсди, 2025 йилда эса ўсиш 7,7 фоизни ташкил этди. 2026 йилнинг биринчи чорагида эса иқтисодий ўсиш 8,7 фоизгача тезлашган.
Moody's ҳисоботида бюджет интизоми алоҳида қайд этилган. Хусусан, бюджет тақчиллиги 2023 йилдаги 4 фоиздан ошиқ даражадан 2025 йилда 2 фоиз атрофидагача қисқарган.
Бунга энергия субсидияларининг камайтирилиши, тарифларни босқичма-босқич бозор даражасига олиб чиқиш ва давлат қарзини бошқариш тизимининг яхшилангани хизмат қилган. Агентлик 2026–2028 йилларда ҳам бюджет тақчиллиги 3 фоиздан паст бўлишини кутмоқда.
Шунингдек, хусусийлаштириш ва давлат корхоналарини ислоҳ қилиш жараёни, жумладан UzNIF'нинг халқаро фонд биржаларида IPO ўтказгани ҳам ижобий омил сифатида баҳоланган. Moody's буни инвесторларнинг Ўзбекистон иқтисодиётига ишончи ортаётганининг белгиси деб ҳисоблайди.
Шу билан бирга, агентлик айрим хатарларни ҳам санаб ўтган. Давлат корхоналари ва давлат банкларининг иқтисодиётдаги улуши ҳануз юқорилиги, уларни хусусийлаштириш мураккаб жараён экани ҳамда геосиёсий ноаниқликлар рейтингнинг кейинги ошишига тўсқинлик қилиши мумкин.
Бироқ ҳозирги шароитда Moody's Ўзбекистоннинг кредит профили Ba2 даражасига мос келишини ва истиқбол барқарор эканини таъкидлаган.
Аввалроқ, Fitch халқаро рейтинг агентлиги ҳам Ўзбекистон суверен кредит рейтингини «BB» даражасида тасдиқлаб, рейтинг кутилмасини «барқарор»дан «ижобий»га оширганди.
