Нефт нархи: «JPMorgan» 150 долларгача ўсишни прогноз қилди
«JPMorgan» таҳлилчилари нефт нархи Ҳўрмуз бўғозида узилишлар бўлса 150 долларгача кўтарилиши мумкинлигини айтди.
Яқин муддатда нефт нархлари бир баррел учун 120–130 долларгача кўтарилиши мумкин, агар Ҳўрмуз бўғози орқали етказиб беришдаги узилишлар май ойининг ўрталаригача давом этса, 150 доллардан ҳам ошиши эҳтимол, деб ҳисоблайди «JPMorgan» таҳлилчилари.
Банкнинг базавий сценарийсига кўра, дунё энергетика экспортининг энг муҳим йўналишларидан бири бўлган Ҳўрмуз бўғози орқали ҳаракат музокаралар йўли билан тикланади. Бундай ҳолда, «JPMorgan» прогнозига кўра, нефт нархлари йилнинг иккинчи чораги давомида баррелига 100 доллардан юқори бўлиб қолади. Йилнинг иккинчи ярмида эса бўғоз орқали ҳаракат қисман тикланиши ва захиралар аста-секин нормаллашиши натижасида нархлар пасайиши кутилмоқда.
Эҳтимолий рецессия хавфи
Банк таҳлилчилари таъкидлашича, нефт нархларининг ўсиш кўлами ва давомийлиги макроиқтисодий шокнинг кучини белгилайди: нархлар қанча узоқ юқори сақланса, талабнинг сусайиши ва эҳтимолий рецессия хавфи шунча ортади.
Энг катта кунлик ўсиш
Июн ойи учун «Brent» нефт фючерслари 2-апрел куни қарийб 8 фоизга ошиб, баррели 109,2 долларга етди, май ойи учун АҚШнинг «WTI» нефти бўйича контрактлар эса қарийб 12 фоизга кўтарилиб, 112 долларга чиқди. «The Wall Street Journal» ҳисоб-китобига кўра, бу сўнгги 6 йил ичида, коронавирус пандемияси давридаги қулаганидан кейинги тикланишдан бери энг катта кунлик ўсиш бўлди. Шу билан бирга, бу тарихда фючерслар бир савдо сессиясида 10 доллардан кўпроқ қимматлашган учинчи ҳолат ҳисобланади.
Нефт компаниялари раҳбарлари ва таҳлилчилар фючерслар янада кўпроқ ўсиши кераклигини, шундагина улар реал бозор қийматини акс эттира бошлашини таъкидламоқда. Спот бозорларда эса нархлар 2008-йилдан бери энг юқори даражага чиққан.
Кечаги раллининг сабаби АҚШ президенти Доанлд Трампнинг сўзлари бўлди. У 1-апрел кечқурунги баёнотида Эронга қарши ҳарбий ҳаракатлар келаси 2–3 ҳафта ичида яна кучайишини айтган. Бу Яқин Шарқдаги уруш яқин вақтда тугаши ҳақидаги умидларни йўққа чиқарди, деб ёзади «CNBC». Шу билан бирга, «ИРНА» давлат агентлиги хабар беришича, Теҳрон Уммон билан ҳамкорликда Ҳўрмуз бўғози орқали кемалар ҳаракатини назорат қилиш механизмини ишлаб чиқмоқда деган хабардан кейин котировкалар кун ичидаги максимумлардан бироз пасайди.
