«Nvidia»дан 40 йиллик тарихни ўзгартирувчи кашфиёт: Компютерингиз энди сизни кўради ва тушунади

Шу йилнинг охирларида «Nvidia» «Windows» ва «Dell» каби брендлар билан ҳамкорликда сунъий интеллект имкониятларини бевосита компютерларга интеграция қилишга ҳозирлик кўрмоқда. Бу орқали АҚШ технология гиганти СИ (сунъий интеллект) бозоридаги ўз ўрнини янада мустаҳкамламоқчи.

Калифорниянинг Санта-Клара шаҳрида жойлашган ва сунъий интеллект чиплари ишлаб чиқаришга ихтисослашган мазкур компания 1 май куни Тайпейда бўлиб ўтган «Nvidia GTC» йиллик тадбирида янги маҳсулотини тақдим этди. Ушбу кучли чиплар ноутбук ва шахсий компютерларни илғор СИ функциялари билан таъминлайди.

Компания бош директори Женсен Хуанг ушбу янги ишланмани «шахсий компютерлар оламининг қайта кашф этилиши» деб баҳолади.

Бу янгилик «Windows» ва «Nvidia» ўртасидаги уч йиллик ҳамкорлик маҳсули бўлиб, «Nvidia»нинг Advanced Micro Devices (AMD) каби чип ишлаб чиқарувчилар, шунингдек, «Intel» ва «Apple» сингари компютер брендларига қарши рақобатда мавқейини кучайтиради.

«Бу янги авлод шахсий компютери бўлади», — деди Хуанг компания томонидан «сунъий интеллектли компютерлар» деб аталаётган ва шу йилнинг кузида сотувга чиқиши кутилаётган янги қурилмаларни ҳаракатга келтирувчи «Nvidia RTX Spark» суперчипини таништирар экан. Мазкур суперчип марказий процессор (CPU) ва график процессор (GPU) имкониятларини ўз ичида бирлаштиради.

Тайваннинг «MediaTek» компанияси билан ҳамкорликда ишлаб чиқилган ушбу чип «Dell», «HP», «Lenovo», «ASUS», «Windows Surface» ва «MSI» каби брендларнинг ихчам компютерларидан жой олади. Кейинчалик бу сафга «Acer» ва «GIGABYTE» моделлари ҳам қўшилиши режалаштирилган.

Дунёнинг энг қиммат компанияси ҳисобланган «Nvidia» ушбу янгиланиш контент яратиш ва гейминг соҳасида катта бурилиш ясашини маълум қилди.

«Агар унинг сизга ёрдам берадиган ва сизни тушунадиган мустақил [сунъий интеллект] агенти бўлса, у билан гаплаша оласиз. У сизни кўра олади. Ундан файлларни ўқиб беришни ёки бирор тадқиқотда кўмаклашишни сўрашингиз мумкин. У жуда кўп нарсага қодир бўлади», — дея таъкидлади Хуанг.

«Windows» ўз баёнотида қайд этишича, «Nvidia RTX Spark» суперчипларида ишлайдиган компютерлар «юқори имкониятли сунъий интеллект моделлари»ни ва мураккаб вазифаларни қийинчиликсиз эплайди. Янги суперчиплар ёрдамида қурилмалар СИ агентларини булутли серверларда эмас, тўғридан-тўғри ўз ичида (локал тарзда) ишга тушириши мумкин.

«Бу шахсий компютерларнинг 40 йиллик тарихидаги биринчи глобал эволюциядир», — деди Хуанг.

«Omdia» технология тадқиқотлари ва консалтинг гуруҳи бош таҳлилчиси Лиан Же Сунинг фикрича, шахсий СИ агентларига талаб ортиб бораётган бир пайтда «Nvidia»нинг бу қадами жуда муҳим аҳамиятга эга.

«Истеъмолчилар учун бу кенгроқ танлов дегани, бу эса доимо яхши», — дейди Су.

«Counterpoint Research» фирмаси таҳлилчиси Нил Шоҳ «Nvidia»нинг ушбу баёнотини «яқин 10 йил ичида компютерлар қиёфасини тубдан ўзгартирадиган» инқилобий қадам деб атади. Шоҳнинг сўзларига кўра, бу қурилмалар ҳар бир хонадонда СИ иловаларидан фойдаланиш кўламини кенгайтиради. Бундан асосий мақсад — ҳар бир уйни «сунъий интеллект суперкомпьютери» билан таъминлаш.

Душанба кунги нутқида Хуанг маълумотлар марказлари учун мўлжалланган янги «Vera» марказий процессорлари (CPU) оммавий ишлаб чиқаришга топширилганини эълон қилди. Унинг айтишича, СИ агентларининг оммалашуви фонида бу маҳсулот компаниянинг асосий даромад манбаларидан бирига айланади. Илк мижозлар қаторидан «Anthropic», «OpenAI» ва «SpaceXAI» ўрин олган.

Шунингдек, Хуанг келажакдаги тадқиқотлар, хусусан, олий таълим соҳаси учун таянч бўлиб хизмат қилувчи гуманоид (одамсимон) робот лойиҳасини ҳам тақдим этди. «Isaac GR00T» деб номланган ушбу роботнинг бўйи қарийб 1,83 метр бўлиб, у Хитойнинг «Unitree» компанияси томонидан яратилган «H2» шассисига асосланган. Робот Сингапурнинг «Sharpa» стартапи ишлаб чиққан, ҳаракатларни ўта аниқликда бажарувчи беш бармоқли чаққон қўллар билан жиҳозланган.

Ҳозиргача СИ компьютерларига бўлган муносабат турлича эканлигини кузатиш мумкин. Масалан, «HP» ушбу қурилмалар чораклик савдо ҳажмини оширишга ёрдам берганини айтса, «Dell» йил бошида талаб кутилганидан пастроқ бўлганини билдирган. Бозордаги талабдан фойдаланиб қолиш илинжида юрган «Qualcomm» ҳам «Windows» билан ҳамкорликда ўзининг СИ компютерларини таклиф қилмоқда.

Шахсий маълумотлар дахлсизлиги бўйича хавотирлар

Бу жараёнда «Windows»нинг иштироки махфийлик ва истеъмолчилар талаби борасида айрим хавотирларни юзага келтирди. Эслатиб ўтамиз, «Windows» 2014 йилда «Cortana» рақамли ёрдамчисини тақдим этган, бироқ у унчалик оммалашмаган эди. Дастурга бўлган ишончнинг йўқолишига асосан махфийлик билан боғлиқ муаммолар сабаб бўлган.

2019 йилда «Motherboard» нашри «Windows» «Xbox» ва «Skype» орқали олинган фойдаланувчи маълумотларини тинглаш учун пудратчиларни ёллагани ҳақида хабар тарқатганди. Оқибатда маҳсулот 2023 йилда бутунлай ёпилиб, унинг ўрнини «Copilot» СИ тизими эгаллади (гарчи у ҳам истеъмолчилар орасида етарлича оммалаша олмаган бўлса-да).

Жорий йилнинг март ойида компания 2008 йилги молиявий инқироздан кейинги энг ёмон чораклик кўрсаткичини қайд этди.

«Nvidia» ва «Windows» янги СИ агентлари «Cortana» билан солиштирганда фойдаланувчиларга кўпроқ манзур бўлишига умид қилмоқда. Техник таъминот тайёр, бироқ асосий савол шундаки: «Windows фойдаланувчилари «Microsoft» нинг навбатдаги ёрдамчисини қабул қилишга тайёрмикин?» — дейди «Counterpoint Research» директори ўринбосари Девид Наранхо «Al Jazeera» телеканалига.

Бироқ, янги авлод агентлари маълумотларни булутли серверларда эмас, тўғридан-тўғри қурилманинг ўзида қайта ишлаши сабабли, бу сафар махфийлик билан боғлиқ хавотирлар бироз бошқачароқ.

«Сунъий интеллект муҳитини яратаётганда, унинг қайси маълумотларга кира олишини қатъий чеклаб қўйиш керак. Унга ҳамма нарсага киришга рухсат беришда ўта эҳтиёткорлик талаб этилади. «Windows» эса гўёки: “Уни «Windows» муҳитига жойлаштирамиз, у компютерингиздаги ҳамма нарсага кирсин ва унга чекланмаган ҳуқуқ берамиз”, демоқда», — деди «Grays Peak Capital» инвестиция фирмаси асосчиси Скотт Стивенс.

У сўзида давом этар экан: «Одатда бундай йўл тутиш мақсадга мувофиқ эмас. Шунинг учун ҳам фақат муайян вазифаларни бажаришига мўлжалланган алоҳида агентлар ёки моделлар яратилади. Ваҳоланки, «Copilot» ва «Windows» ҳолатида ундан фойдаланиш учун ҳамма нарсага рухсат бериш талаб қилинди. Одамларга эса бу тобора ёқмаяпти. Чунки бунинг учун унга бутун бошли операцион тизимингизни ва барча дастурларингизни топшириб қўйишингиз керак».

Ушбу эълондан сўнг Уолл-стритда «Nvidia» акциялари кунлик савдоларда 6 фоизга қимматлади. «Windows» акциялари 2,2 фоизга, «Dell» эса 10 фоизга ўсди. Ушбу янгилик фонида асосий рақобатчиларнинг акциялари эса арзонлашди: хусусан, AMD акциялари 0,5 фоизга, «Intel» кўрсаткичи эса 4,5 фоизга пасайди.