Ўзбекистон етти давлатдан импорт божларини бекор қилади

Шавкат Мирзиёев 1 декабр куни қурилиш материаллари саноатини ривожлантиришга қаратилган чора-тадбирларни тасдиқлади. Унга кўра, Ўзбекистон Саудия Арабистони, Қатар, Мўғулистон ҳамда Марокаш, Жазоир, Тунис ва Миср каби Шимолий Африка давлатларидан келтириладиган товарларга бож тўловлари 2027 йилгача босқичма-босқич бекор бўлади.

Ҳужжатда қурилиш материаллари ишлаб чиқариш ҳажмини йиллик 62 трлн сўмга етказиш, экспортни эса 1,5 миллиард долларга ошириш вазифаси белгиланган. Экологик тоза ва энергия тежамкор материаллар ишлаб чиқаришни рағбатлантириш, шунингдек, маҳсулот хавфсизлигини назорат қилиш саноатдаги асосий йўналишлардан бири этиб белгиланди.

Қурилиш материаллари учун зарур минерал хомашё, арматура, қўшимча моддалар ва бошқа асосий компонентларнинг импорти 2028 йил бошигача божсиз тартибда амалга оширилади. ЖСТ билан ишлайдиган идоралараро комиссия икки ҳафтада божсиз олиб кирилиши мумкин бўлган хомашё рўйхатини тасдиқлаши кутилмоқда. Бу маҳаллий ишлаб чиқариш қувватларини кенгайтириш ва харажатларни камайтиришга хизмат қилиши мумкин.

Саноатда қиймати 3,5 миллиард долларлик янги лойиҳалар амалга оширилиши режалаштирилган. Бош вазир ўринбосари Жамшид Хўжаевга Қорақалпоғистон Вазирлар Кенгаши ва маҳаллий ҳокимликлар билан бирга бир ой ичида бу лойиҳаларнинг асосий параметрларини белгилаш вазифаси юклатилди.

Шунингдек, Афғонистон билан чегарадаги «Термиз» пунктларидан ўтишда маҳаллий корхоналар вакиллари учун хавфсизлик чоралари кучайтирилади. Қора металл ва унинг прокати (ТН ВЭД 7210) экспортини амалга ошириш тартиби ҳам енгиллаштирилиб, улар учун олдиндан тўлов, банк кафолати ёки экспорт шартномасини суғурта қилиш талаби жорий этилмайди.

Эслатиб ўтамиз, 2026 йилдан қурилиш материаллари хавфсизлигини назорат қилиш кучайтирилиб, талабларга жавоб бермайдиган корхоналар ягона электрон реестр орқали давлат харидларидан четлатилади.