Президент ЖЧда иштирок этган футболчилардан айб қидирмасликка чақирди
Шавкат Мирзиёев ватан шарафини ҳимоя қилган жамоа аъзоларига «ортиқча ҳис-туйғу билан эътироз билдириш, улардан айб қидириш халқимизга хос иш эмаслигини, аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим»лигини айтиб ўтди.
© UFAПрезидент Шавкат Мирзиёев 30 июнь куни ёшлар билан учрашувда Ўзбекистон миллий терма жамоасининг футбол бўйича жаҳон чемпионатидаги иштирокига тўхталиб ўтди.
«Миллий жамоамизнинг АҚШ ва Мексика майдонларидаги ўйинларини бутун халқимиз билан бир тан-у, бир жон бўлиб, катта ҳис-ҳаяжон билан кузатиб бордик. Футболчиларимиз ФИФА рейтингида 5-ўринда турган Португалия, 13-ўриндаги Колумбия ҳамда кўплаб футболчилари Европанинг етакчи клубларида тўп сурадиган Конго терма жамоалари билан ўтказилган ўйинлар орқали ўзига тажриба орттирди, мундиал нафасини ҳис қилди десак, тўғри бўлади. Аббос Файзуллаев ва Элдор Шомуродов жаҳон чемпионатидаги илк голларини киритиб, халқимизга хурсандчилик бағишлади.
Миллий терма жамоамизнинг жаҳон чемпионатидаги иштироки тўғрисида турли фикрлар билдирилмоқда.
Лекин Ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос иш эмас. Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим», – деди Мирзиёев.
Катта ғалабалар ҳали олдинда экани, бунинг учун футболни ривожлантиришга янада кенг шароитлар яратилиши, бу соҳага инвестиция кўпайтирилиши таъкидланди. Энг аввало, болалар футболига эътибор кучайтирилиб, мазкур спорт умуммиллий ҳаракатга айлантирилади.
2027 йилнинг январида Саудия Арабистони майдонларида ўтказиладиган футбол бўйича Осиё кубогига тайёргарлик ҳозирдан бошланади.
«Биз жамоамизга ишонамиз ва ушбу мусобақада ҳам бутун халқимиз билан қўллаб-қувватлаймиз!» – деди Президент.
Маълумот учун, Ўзбекистон миллий терма жамоаси ўз тарихида илк бор Жаҳон чемпионати финал босқичида иштирок этди. Гуруҳ босқичининг биринчи турида вакилларимиз Колумбияга 1:3 ҳисобида мағлуб бўлди. Ушбу учрашувда Аббосбек Файзуллаев миллий терма жамоанинг Жаҳон чемпионатлари тарихидаги илк голини киритди.
Иккинчи турда Фабио Каннаваро шогирдлари Португалияга 0:5 ҳисобида йирик мағлубиятга учради. Гуруҳ босқичининг сўнгги баҳсида эса Ўзбекистон Конго ДРга қарши майдонга тушди ва 1:3 ҳисобида имкониятни бой берди. Шу тариқа миллий терма жамоа дебют мундиалида гуруҳ босқичини очко жамғаролмасдан якунлади.
