Қозоғистондан арзон бензин ташишга йўл ёпилмоқда: энди чегарадан кунига фақат бир марта ўтиш мумкин

Қозоғистонда ёқилғи маҳсулотларини чегарадан ноқонуний олиб чиқиб кетилишининг олдини олиш мақсадида чегарадош давлатлардан юк ва енгил автомобилларнинг мамлакатга киришига чеклов жорий этилди. Энди транспорт воситалари Қозоғистон ҳудудига бир суткада фақат бир марта кириши мумкин. Бу ҳақда мамлакат энергетика вазири ўринбосари Қайирхан Туткишбаев ҳукумат брифингида маълум қилди.

Чеклов мамлакатдан арзон ёқилғи захираларини ташиб кетишга қарши қаратилган комплекс чора-тадбирларнинг бир қисми ҳисобланади.

«Ҳозирги вақтда чегарадош давлатлардан юк ва енгил транспорт воситалари Қозоғистон ҳудудига бир суткада бир мартадан ортиқ кира олмаслиги тўғрисидаги қоида амал қилмоқда», – деди вазир ўринбосари.

Унинг сўзларига кўра, айни пайтда ёқилғининг «яширин» (норасмий) олиб чиқилишига қарши курашга алоҳида эътибор қаратилмоқда. Бунинг учун ҳуқуқ-тартибот идоралари ҳамкорликда назорат тадбирларини олиб бормоқда.

«Асосий ишлар ёқилғини норасмий олиб чиқиш учун ишлатиладиган қўшимча ёқилғи баклари ўрнатилган автомобилларни аниқлашга қаратилган. Бу иш билан Ички ишлар вазирлиги, Молиявий мониторинг агентлиги, Чегара хизмати ва божхона органлари биргаликда шуғулланмоқда», – дея таъкидлади Қайирхан Туткишбаев.

Мутасаддининг қўшимча қилишича, чегараолди ҳудудларида ёқилғини ноқонуний олиб чиқишга уринган қоидабузарлар мунтазам равишда аниқланмоқда.

«Бугунги кунда Қозоғистондан ёқилғи-мойлаш маҳсулотларининг норасмий олиб чиқилишига йўл қўймасликка қаратилган чора-тадбирлар мажмуи амал қилмоқда», – дея хулоса қилди у.

Бензин билан боғлиқ вазият ва назоратнинг кучайтирилиши

Аввалроқ Қозоғистон бош вазири Ўлжас Бектенов ёқилғи-мойлаш маҳсулотларининг ноқонуний олиб чиқилиши устидан назоратни кучайтиришни топширган эди. Ҳукумат маълумотларига кўра, ўтказиш пунктларида фақатгина икки сутка ичида қўшимча баклар ва канистрларда 3 тоннадан ортиқ ёқилғини олиб чиқишга қаратилган 61 та, йил бошидан буён эса 593 та шундай уринишнинг олди олинган.

Жорий йилнинг май ойида ИИВ Қозоғистондан ташқарига бензин олиб чиқиш мақсадида ноқонуний қўшимча баклар ўрнатган автомобиллар аниқланганини хабар қилган эди. Ўшанда қоидабузарлар маъмурий жавобгарликка тортилган, транспорт воситалари эса қонунбузилиш ҳолати бартараф этилгунга қадар махсус автотураргоҳларга жойлаштирилган.