Собиқ мураббий Ўзбекистон терма жамоасининг Жаҳон чемпионатидаги муваффақиятсизлигида Каннаварони айблади
Миллий терма жамоанинг россиялик собиқ мураббийи Валерий Непомняши Жаҳон чемпионатида Ўзбекистон термасини Темур Кападзе бошқариши керак бўлганлигини, Фабио Канавваро эса футболчиларнинг салоҳиятини тўғри баҳолай олмаганини айтди.
© TASSЎзбекистон терма жамоасининг собиқ мураббийи Валерий Непомняши Россия нашрига интервью берди. Унда собиқ мураббий Ўзбекистон терма жамоасининг мундиалдаги муваффақиятсизлигига ҳам тўхталиб ўтди.
«Балки мен буни айтишим мутлақо ўринли эмасдир, лекин менимча, Тимур Кападзе жамоани бошқариши керак эди. Менимча, Каннаваро ўйинчиларнинг даражасини тўғри баҳолай олмади ва ўйинлар учун тўғри тактикани танламади. У ўйинчиларни ўз қарашларига мослаштириш ўрнига, уларнинг энг яхши фазилатларидан фойдаланиши керак эди. Улар билан узоқ вақтдан бери ишлаган Кападзе уларнинг имкониятларини яхшироқ билади. Биринчи ўйинда жамоа жуда эҳтиёткорлик билан ўйнади, иккинчисида эса, аксинча, жуда бепарво ва таваккалига ўйнади», - деди Непомняши.
Дарҳақиқат, Ўзбекистон терма жамоаси Колумбияга қарши ўйинда илк голни ўтказиб юборганига қарамай, иккинчи бўлимда майдонда тенг кураш кўрсатган эди. Португалияга қарши ўйинда эса рақибларнинг иккита тезкор голи ўйин сценарийсини тубдан ўзгартириб юборди. Ҳимоя чизиғидаги хатолар терма жамоанинг ўйинида концентрациянинг йўқолишига олиб келди.
«Учинчи ўйинда вазият бироз яхшиланди, аммо рақиб унчалик кучли эмас эди. Мен Ўзбекистон учинчи ўринда кейинги босқичга чиқиши керак деб ўйлагандим. Биз билган ўйинчилар жуда яхши ўйнашди. Португалия ёки Колумбия билан тенг шароитларда ўйнашга уриниш мутлақо нотўғри эди» - дея қўшимча қилди терма жамоа собиқ мураббийи.
Непомняши 2006 йилда Ўзбекистон терма жамоасига мураббий сифатида олиб келинган эди. Россиялик мутахассис қўл остида терма жамоа жами 6 та учрашувда майдонга тушган ва 3 та ғалаба 2 та дуранг ва битта мағлубият қайд этган.
Маълумот учун, Ўзбекистоннинг мундиалга чиқишида дастлаб Сречко Катанес, кейинчалик эса Темур Кападзе муҳим роль ўйнади. Бироқ УФА 2025 йилнинг октябрь ойида италиялик собиқ футболчи Фабио Каннаварони мураббий этиб тайинлади.
Канавваро бошчилигидаги терма жамоа Жаҳон чемпионатининг барча ўйинларида мағлуб бўлди. Жамоа 3 та ўйинда 2 та гол урди, 11 та гол ўтказиб юборди.
