Тайван фонд бозори капитализация бўйича Буюк Британияни ортда қолдирди
Кичик бир орол давлат жаҳоннинг энг қудратли молиявий марказларидан бирини доғда қолдирди. Ушбу тарихий бурилишга айнан қайси соҳадаги кутилмаган портлаш сабаб бўлди?
Тайван фонд бозори капитализацияси бўйича тарихда илк бор Буюк Британияни ортда қолдириб, жаҳон рейтингида кутилмаганда еттинчи ўринга чиқиб олди. «Bloomberg» агентлигининг маълумотларига кўра, жорий йилнинг 15 апрел ҳолатига Тайван акцияларининг умумий бозор қиймати мисли кўрилмаган 4,14 трлн долларга етган.
Айни шу вақтда Буюк Британиянинг молиявий кўрсаткичи 4,09 триллион долларни ташкил қилди. Кичик орол давлатнинг бундай қудратли молиявий марказни ортда қолдириши глобал бозорда чинакам сенсацияга айланди.
Мутахассисларнинг фикрича, мамлакат фонд бозорининг бу қадар шиддатли ўсишига сунъий интеллект технологияларига киритилган инвестицияларнинг кескин ортгани сабаб бўлмоқда. Бутун дунёда сунъий интеллект чипларига бўлган талаб портламоқда.
«Бу технологиялар ва сунъий интеллектнинг чинакам суперциклидир», — дея таъкидлади «BNP Paribas» банкининг Осиё-Тинч океани минтақаси бўйича раҳбари Уилям Браттон.
Европа бозори ортда
Таҳлилчиларнинг қайд этишича, Буюк Британия ва Европанинг аксарият қисмида ушбу технологик «суперцикл»дан фойда кўраётган, сунъий интеллектга асосланган компаниялар деярли йўқ. Айнан шу омил Ғарб фонд бозорларининг секинлашишига ва рақобатда ютқазишига олиб келмоқда.
«Financial Times» нашри маълумотларига кўра, Британиянинг энг йирик «FTSE 100» фонди индекси йил бошидан буён бор-йўғи 6,1 фоизга ўсган. Бу кўрсаткич Тайваннинг «Taiex» индекси қайд этган 26,5 фоизлик ҳайратланарли сакраш билан солиштирганда жуда пастдир.
Энг йирик ишлаб чиқарувчи
Агентлик хабарига кўра, Тайван фонд бозорининг кескин сакраши биринчи навбатда дунёдаги энг йирик чип ишлаб чиқарувчиси — «Taiwan Semiconductor Manufacturing Company» (TSMC) фаолияти билан бевосита боғлиқ. Ушбу гигант компаниянинг улуши бутун мамлакат бозор капитализациясининг қарийб 45 фоизини ташкил қилади.
Яқинда «TSMC» компанияси 2026 йилнинг биринчи чораги учун рекорд даражадаги даромадни эълон қилди. Унинг соф фойдаси йиллик ҳисобда 58 фоизга ўсиб, 18 миллиард долларни ташкил этган бўлса, умумий тушуми 35 фоизга ошиб кетди.
