Тошкентдаги қуюқ туман сабаби, Тимур Кападзе танлови ва ўсаётган инфляция — 1 декабр дайжести

Тошкентдаги қуюқ туманга нима сабаб бўлмоқда?

Сўнгги кунларда Ўзбекистон ҳудудида кучайган совуқ антисиклон ўз таъсири натижасида ҳаво босимининг ошиши, ҳароратнинг пасайиши ва узоқ муддатли инверсияни келтириб чиқармоқда. Шу боис Тошкент ва бошқа ҳудудларда қуюқ туманлар tez-tez кузатилмоқда. Инверсия шароитида ҳаводаги чанг, тутун ва майда заррачалар пастки қатламда тўпланиб қолади, уларнинг тарқалиши эса секинлашади. Бу табиий метеорологик жараён бўлиб, 5 декабргача давом этиши мумкинлиги айтилади.

Махсус комиссия ҳаво ифлосланишини камайтириш бўйича кўрилаётган чораларни маълум қилди: иссиқхоналар ва ноқонуний қурилиш объектларига рейдлар, автотранспорт назорати, кўчаларни намлаш ва тозалаш ишлари кучайтирилди. Натижада PM2.5 кўрсаткичи қисқаргани қайд этилди, аммо антисиклон сақланаётгани uchun туман тез тарқалмаяпти. Масъул идоралар узлуксиз мониторинг ва узоқ муддатли экологик ечимлар устида ишни давом эттирмоқда.

Ноябр ойида инфляция 0,7 фоизга ўсди

Ноябрда истеъмол бозоридаги товар ва хизматлар нархлари ўртача 0,7 фоизга кўтарилди. Йиллик инфляция 107,5 фоизни ташкил қилиб, ўтган йилнинг шу даврига нисбатан пасайган. Мавсумий омиллар таъсирида айрим озиқ-овқатлар, хусусан, бодринг, помидор, булғор қалампири ва бақлажон нархларида кескин ўсиш кузатилиб, умумий инфляция босимига катта таъсир кўрсатди. Шу билан бирга, сабзи ва шолғом каби айрим маҳсулотлар арзонлашиб, бозордаги ўта юқори босимни бир қадар юмшатди.

Ноозиқ-овқат сегментида пропан, бензин, цемент ва кийим-кечак нархлари ошган. Хизматлар соҳасидаги кўтарилиш эса 0,3 фоизни ташкил этди. Миллий статистика қўмитаси мамлакат бўйлаб 10 мингдан ортиқ савдо ва хизмат кўрсатиш нуқталаридаги 420 турдаги товар ва 90 турдаги хизмат нархини ўрганган ҳолда ушбу натижаларни эълон қилди. Эслатиб ўтамиз, октябрда инфляция 0,6 фоиз бўлган эди.

Энди солиқдан қарзи борларнинг электр тўловига чеклов қўйилиши мумкин

2026 йил 1 январдан Наманган вилоятида мол-мулк ва ер солиғидан 1 миллион сўмдан ортиқ қарзи бор жисмоний шахсларни аниқлаш ва уларга нисбатан чора кўришда электр энергияси биллинг тизими синов тариқасида қўлланилади. Президент қарорига кўра, ушбу механизм солиқ қарздорлигини қисқартириш ва бошқарувни такомиллаштиришга қаратилган бўлиб, тажриба 1 октябргача давом этади. Натижалар ижобий бўлса, тизим мамлакатнинг бошқа ҳудудларига ҳам татбиқ этилади.

Йиғимлар бўйича интизомни кучайтириш мақсадида, декабрдан барча ҳудудларда чиқинди хизматларидан қарзи бор фуқароларнинг электр тўлов амалиётлари вақтинча чекланмоқда. Бунга қўшимча равишда, Тошкентда қарздор 6 мингга яқин фуқаро электр тўлови бўйича вақтинча чекловга дуч келгани маълум қилинган.

Темур Кападзе «Навбаҳор» бош мураббийи этиб тайинланди

Наманганнинг «Навбаҳор» клуби 44 ёшли мутахассис Темур Кападзе билан шартнома имзоланганини ва унинг жамоага расман бош мураббий сифатида тайинланганини маълум қилди. Клуб матбуот хизматига кўра, Кападзе раҳбарият билан учрашувда жамоанинг келгуси режалари, тактик йўналишлари ва ривожланиш стратегияларини батафсил муҳокама қилган.

Музокаралар натижасида у расман лавозимга киришди ва жамоа билан иш бошлади. Эслатиб ўтамиз, Темур Кападзе Ўзбекистон миллий терма жамоасини Олимпиада ва Жаҳон чемпионатига олиб чиққан мураббий сифатида танилган.