Тошкентдаги яна бир бозор вақтинча ёпилди
Аввалроқ пойтахтдаги учта бозорнинг айрим қисмлари вақтинча ёпилганлиги ҳақида хабар берилганди.
© yadex mapsТошкент шаҳридаги “Аския” деҳқон бозори ёнғин хавфсизлиги қоидалари қўпол равишда бузилгани сабабли вақтинча ёпилди. Бу ҳақда 9 апрел куни Фавқулодда вазиятлар вазирлиги маълум қилди.
Вазирлик ахборотига кўра, пойтахтда бир қатор бозорларда давлат ёнғин назорати текширувлари ўтказилган. Уларнинг натижасида бир нечта савдо нуқталарида жиддий камчиликлар аниқланган.
Жумладан, Мирзо Улуғбек туманидаги “Наврўз” бозори, Бектемир туманидаги “Қўйлиқ” қурилиш бозори, шунингдек, “Абу Сахий”, “Фарҳод” ва бошқа савдо объектларининг айрим ҳудудларида ёнғин хавфсизлиги талаблари бузилгани қайд этилди. Айрим жойларда электр таъминоти вақтинча узилган.
Шу билан бирга, “Ўрикзор” савдо комплексининг тўққизта блоки ҳам электр тармоғидан узилди. Камчиликлар бартараф этилганидан кейин ушбу объектларда фаолият қайта тикланиши маълум қилинган.
Яккасарой туманида жойлашган “Аския” бозорида эса ҳолат талабга жавоб бермаслиги сабабли бутун бозор электр таъминотидан узилиб, фаолияти вақтинча тўхтатилди.
Вазирлик таъкидлашича, ушбу чоралар тадбиркорликка тўсқинлик қилиш учун эмас, балки фавқулодда ҳолатларнинг олдини олиш ва аҳоли гавжум жойларда хавфсизликни таъминлашга қаратилган.
Қайд этилишича, 5 апрел куни Чилонзор туманидаги бозорда содир бўлган ёнғиндан кейин текширувлар янада кучайтирилган. Шу муносабат билан бундай назорат тадбирлари йил давомида мунтазам давом эттирилади.
Эслатиб ўтамиз, аввалроқ Тошкентдаги учта бозорда ёнғин хавфсизлиги қоидалари бузилгани аниқланиб, айрим ҳудудлар фаолияти вақтинча тўхтатилганлиги ҳақида хабар берган эдик.
