«Anthropic» aksiyalarini sotib olish uchun investorlar navbatga tizilmoqda

Korporativ sun’iy intellekt vositalari bozorida yetakchi hisoblangan «Anthropic» yirik investitsiya oqimiga duch keldi. Investorlar uning biznesini deyarli «OpenAI» darajasida baholashni taklif qilmoqda.

Garchi startap hozircha aksiyalarni sotishdan bosh tortsa-da, uning qiymati birjadan tashqari platformalarda allaqachon 700 mlrd dollar atrofiga yaqinlashgan. Bu holat kompaniyaning kuzda kutilayotgan IPO jarayoni oldidan kuzatilmoqda.

Venchur investorlar esa «Anthropic» uchun yangi investitsiya raundini taklif qilmoqda. Uning natijasida SI-kompaniya qiymati 800 mlrd dollar yoki undan ham yuqori darajaga chiqishi mumkinligi «Bloomberg» tomonidan ma’lum qilingan.

«Anthropic» qiymati 75 foizga oshgan

So‘nggi haftalarda «Anthropic» venchur investorlardan bir necha bor aksiya sotib olish takliflarini oldi. Ularning hisob-kitoblariga ko‘ra, «Claude» asoschisi bo‘lgan «Anthropic» mahsulotlari orqali kompaniya qiymati 800 mlrd dollar yoki undan ham yuqori bo‘lishi mumkin.

Bu raqam 2026-yil fevraldagi oxirgi investitsiya raundidagi baholash – 380 mlrd dollardan ikki barobardan ham ko‘p. Shunga qaramasdan, kompaniya rahbariyati hozircha yangi investitsiya raundini qabul qilmagan.

«Caplight» platformasi ma’lumotiga ko‘ra, o‘tgan uch oyda «Anthropic» qiymati 75 foizga oshgan va hozir taxminan 688 mlrd dollar atrofida baholanmoqda.

Investorlar qiziqishining kuchayishi asosan kompaniya daromadlarining tez o‘sishi va ayniqsa dasturchilar uchun mo‘ljallangan «Claude Code» SI-assistentining jadal rivojlanishi bilan bog‘liq.

«Anthropic» kod yozish, kiberxavfsizlik va biznes jarayonlarini avtomatlashtirishga qaratilgan bir qator SI vositalarini ishlab chiqqan. Bu mahsulotlar korporativ mijozlar tomonidan faol qabul qilinmoqda va daromadlarning keskin oshishiga hamda «OpenAI» bilan raqobatning kuchayishiga olib kelmoqda.

«OpenAI»ga bo‘lgan qiziqishning pasayishi

«OpenAI»ga bo‘lgan investorlar qiziqishi pasaygani fonida bozor e’tibori Anthropic tomon siljimoqda, deb yozadi «Bloomberg».

«Next Round Capital» rahbari Ken Smitning aytishicha, u bir necha hafta davomida yuzlab institutsional mijozlar orasidan «OpenAI» aksiyalarini sotib olmoqchi bo‘lgan xaridorlarni topa olmagan. Aksincha, mijozlar taxminan 2 mlrd dollar mablag‘ni «Anthropic» ulushlarini sotib olishga yo‘naltirishga tayyor ekanini bildirgan.

«Caplight» ma’lumotlariga ko‘ra, 2026-yil yanvar–mart davrida «OpenAI» aksiyalarini sotmoqchi bo‘lganlar soni xaridorlardan besh barobar ko‘p bo‘lgan. Bu holat 2025-yil oxiridagi vaziyatga qaraganda keskin o‘zgargan – o‘sha paytda xaridorlar ustunlik qilgan.

Har ikki kompaniya ham 2026-yil kuzida IPO (birjaga chiqish)ga tayyorgarlik ko‘rmoqda va aksiyalarni ruxsatsiz qayta sotishni cheklaydi. Shunga qaramay, ikkilamchi bozorlarda bu qimmatli qog‘ozlarga kirish imkoniyati saqlanib qolmoqda.

Analitik Adam Kroulining fikricha, «OpenAI» va «Anthropic» baholari o‘rtasidagi farq investorlarni «Anthropic»ni ko‘proq sotib olishga undamoqda, chunki ular kelajakdagi o‘sishga ko‘proq umid qilmoqda.

«OpenAI» yoki «Anthropic»?

«Seeking Alpha» tahlilchilari aprel oyi boshida investorlarni «OpenAI» va «Anthropic» IPO’si oldidan ehtiyotkor bo‘lishga chaqirgan.

Kris Demutning fikricha, «Anthropic» bahosi «biroz ko‘proq asosli» ko‘rinadi. Uning aytishicha, hozir har ikki kompaniya ham investorlar orasida juda ommabop, lekin ularning aksiyalari allaqachon ancha qimmatlashib ketgan.

Jonatan Veber ham hozirgi paytda «Anthropic»ni ko‘proq jozibador deb hisoblaydi. Uningcha, startapning dasturlash uchun SI yechimlarga e’tibori unga «o‘ziga xos bozor ustunligi» beradi, shuningdek, «Alphabet» va «Amazon» tomonidan qo‘llab-quvvatlanishi xavflarni kamaytiradi.

Juliya Ostian esa investorlarga IPO vaqtida shoshilmaslikni maslahat beradi. Uning fikricha, ikki kompaniya ham hozir juda qimmat. Masalan, «OpenAI» qiymati uning yillik daromadidan 35 baravar yuqori – bu esa u «katta zarar ko‘rayotgan kompaniya uchun juda yuqori va hatto g‘ayritabiiy daraja» deb ta’riflangan.

U yakunda shunday degan: Anthropicni u nisbatan qiziqroq investitsiya deb hisoblaydi, lekin hozirgi sharoitda hech bir kompaniyani «haqiqatan ham ideal investitsiya» deb bo‘lmasligini ta’kidlaydi.