AQSHdagi mavsumiy ishlar bo‘yicha ogohlantirish

O‘zbekiston Migratsiya agentligi AQSHdagi mavsumiy ishlar dasturi doirasida fuqarolarni ogohlantirdi. Unga ko‘ra, fuqarolar faqat rasmiy e’lonlar va tasdiqlangan axborotlarga ishonishi lozim.

Mavsumiy ish tashkiloti bilan hamkorlik

Ma’lum qilinishicha, agentlik va USAFARMLABOR tashkiloti o‘rtasidagi hamkorlik doirasida dastlabki talabnomalar qabul qilinib bo‘lingan. Hozirgi kunda mazkur jarayon bosqichma-bosqich amalga oshirilmoqda.

Ish beruvchilar ma’lumotiga ko‘ra, ayrim fuqarolar hamkor tashkilot saytlari yoki fermer xo‘jaliklariga mustaqil ravishda murojaat qilishga harakat qilmoqda. Biroq bunday yo‘l bilan murojaat qilish hech qanday natija bermasligi ta’kidlandi.

Agentlik tushuntirishicha, fuqarolarni ro‘yxatga olish faqat ish beruvchining rasmiy talabnomasi asosida tanlov e’lon qilinganidan keyin amalga oshiriladi. Shu sababli mustaqil ravishda ro‘yxatdan o‘tish yoki to‘g‘ridan-to‘g‘ri murojaat qilish foydasiz hisoblanadi.

Shu bilan birga, fuqarolardan turli vositachilar tomonidan taklif etilayotgan pulli xizmatlar va «kafolatlangan ish» va’dalaridan ehtiyot bo‘lish so‘raldi. Rasmiy idoralar barcha ma’lumotlar faqat davlat va hamkor tashkilotlarning rasmiy kanallari orqali e’lon qilinishini eslatdi.