Google йилнинг энг оммабоп эможисини эълон қилди

Google компанияси Android смартфонларидаги Gboard клавиатураси орқали бутун дунё бўйлаб фойдаланувчилар томонидан киритилган 665 миллионта эможини таҳлил қилиб, 2025 йилнинг энг оммабоп смайликлари рейтингини эълон қилди.

Тадқиқот натижаларига кўра, рейтингда «кўз ёшлари оқаётган юз» (😭) эможиси биринчи ўринни эгаллаган. У илгариги етакчилар — «қувонч кўз ёшлари билан кулаётган юз» (😂) ҳамда «кулиб думалаётган юз» (🤣) смайликларини ортда қолдирган.

Маълум қилинишича, 😭 эможиси фақат чинакам қайғу ёки хафаликни ифодалаш учун ишлатилмайди. Ёзишмаларда ушбу белги кулги, кучли ҳайрат, ноқулайлик, завқланиш ёки ҳис-туйғуларнинг ҳаддан ташқари кўплигини англатиши мумкин. Google тадқиқотчилари ушбу рамз оммабоплигининг ошишини зумерларнинг (Z авлоди) одатлари билан боғламоқда — бир йил ичида мазкур эмодзидан фойдаланиш 37 фоизга ошган.

Ўсмирлар ва зумерлар «қувонч кўз ёшлари билан кулаётган юз» ва «кулиб думалаётган юз» белгиларини жуда сийқаси чиққан («заезженными») деб ҳисоблаб, уларни тобора камроқ танламоқда. Мутахассисларнинг қайд этишича, ёшлар эски эмодзиларнинг маъносини қайта англамоқда. Катта авлод вакиллари учун бу рамзлар ҳамон самимий кулгини кўрсатишнинг тушунарли усули бўлиб қолса, ёш фойдаланувчилар кўпинча драматикроқ ёки абсурд вариантларни танламоқда.

Энг оммабоп ўнталик ва рекорд даражада ўсган эможилар

Рейтингнинг кучли ўнталигидан қуйидаги эможилар жой олди:

😭 — баланд овоз билан йиғлаётган (кўз ёшлари оқаётган) юз;

🤣 — кулиб думалаётган юз;

😂 — қувонч кўз ёшлари билан кулаётган юз;

❤️ — қизил юрак;

🙏 — бирлаштирилган кафтлар;

😘 — бўса юбораётган юз;

🥰 — юракчалар билан жилмаяётган юз;

👍 — кўтарилган бош бармоқ;

😍 — кўзлари юракча шаклидаги юз;

😁 — кўзлари юмилган ҳолда жилмаяётган юз.

Йил давомида энг тез ўсган эможи сифатида «сўлган атиргул» (🥀) қайд этилди. Бир йил ичида ундан фойдаланиш бирданига 190 фоизга ўсиб, рейтингнинг 93-поғонасига кўтарилган. Одатда ушбу белги қайғу, ҳафсала пир бўлиши ёки қалб синишини ифодалаш учун юборилади.

Шунингдек, сўнгги йилларда «Моаи ҳайкали» (🗿) эможисининг машҳурлиги ҳам сезиларли даражада ошган. Хусусан, 2021 йилда у 482-ўринда бўлган бўлса, 2025 йилга келиб 33-ўринга чиқиб олган. Ёшлар ушбу рамздан ҳар қандай абсурд вазиятда хотиржамлик, енгил бефарқлик ёки «тошдек қотган қиёфа»ни намойиш этиш учун муносабат сифатида фойдаланмоқда.

Стикерлар ва GIF-тасвирларнинг ўрни кенгаймоқда

Хабарда таъкидланишича, эмодзилар эндиликда интернет мулоқотининг ягона воситаси бўлмай қолди. Фойдаланувчилар аниқроқ реакцияни билдириш имконини берадиган стикерлар ва GIF-тасвирларни кўпроқ маъқул кўрмоқда.

Масалан, битта смайлик ўрнига сериалдан таниқли кадрни юбориш мумкин — кинодаги битта тасвирнинг ўзи сарказм, ишончсизлик ёки шок ҳолатини етказиб бериш учун етарли бўлади. Жумладан, «Декстер» сериалидаги сержант Доакс тасвири акс этган стикер бирор нарсадан шубҳаланганда ёки ҳақиқатни билиб, лекин уни исботлашнинг имкони бўлмаганда жуда катта оммабопликка эга бўлмоқда. Шунингдек, тармоқда «WhatsApp учун стикер ва мемлар қироличаси» деб аталган жажжи Роҳининг тасвирларидан ҳам кенг фойдаланилмоқда.

Google компаниясининг хулоса қилишича, эмодзилар орқали мулоқот қилиш усулларининг ўзи ҳам ўзгармоқда: одатий рамзлар янги маъноларга эга бўлмоқда, эскирганлари эса замонавий интернет маданиятига мос келадиган вариантларга ўз ўрнини бўшатиб бермоқда, дейилади хабарда.