Milliy reytingi yuqori texnikumlarga rag‘bat puli beriladi

Adliya vazirligi tomonidan o‘rta maxsus va kasbiy ta’lim tashkilotlarining milliy reytingini yuritish hamda ularni rag‘batlantirish tartibi to‘g‘risidagi idoraviy hujjat davlat ro‘yxatidan o‘tkazildi.

Reyting Ta’lim sifatini ta’minlash agentligi tomonidan shakllantiriladi

Yangi tartibga ko‘ra, texnikumlar va akademik litseylarning milliy reytinglari alohida shakllantiriladi. Ularni yuritish vakolati Ta’lim sifatini ta’minlash agentligiga yuklatilgan bo‘lib, reyting natijalari har yili 10-oktabrga qadar e’lon qilinadi.

Milliy reyting ma’lumotlari quyidagi manbalardan shakllantiriladi:

Vazirlik va idoralarning axborot tizimlaridagi ma’lumotlar;

Ta’lim tashkilotlari tomonidan kiritiladigan hujjatlar;

Umummilliy so‘rovnoma natijalari.

Shuningdek, har yili 30-mayga qadar o‘quvchilar, pedagoglar va ish beruvchilar o‘rtasida umummilliy so‘rovnoma o‘tkazilishi belgilangan. Bu mexanizm ta’lim sifatiga xolis baho berish imkonini yaratadi.

Rag‘batlantirish

Milliy reytingda eng yuqori natija qayd etgan 50 ta texnikum bazaviy hisoblash miqdorining 3000 baravarigacha mablag‘ bilan rag‘batlantiriladi. Bu taxminan 1,2 milliard so‘mga teng bo‘lib, ajratilgan mablag‘ning 80 foizi moddiy-texnika bazasini mustahkamlashga, 20 foizi esa rahbar va xodimlarni moddiy qo‘llab-quvvatlashga yo‘naltiriladi.

Ushbu tartib kasbiy ta’lim tizimida raqobatni oshirish, ta’lim sifatini yaxshilash va muassasalarni samarali faoliyatga rag‘batlantirishga xizmat qilishi kutilmoqda.