Mirziyoyev Toshkentni dunyoda eng ko‘p mozaikali shahar maqomiga olib chiqmoqchi
Prezident 2030 yilgacha turizmni rivojlantirish rejasini tasdiqlab, Toshkent modernizmi yodgorliklarini UNESCO ro‘yxatiga kiritish va shaharni mozaikalari bilan tanitish vazifasini qo‘ydi.
O‘zbekiston prezidenti 2030 yilgacha turizm sohasini rivojlantirishga qaratilgan qarorni imzoladi. Hujjatda poytaxt Toshkentning madaniy merosini jahon miqyosida targ‘ib qilishga oid bir qator yo‘nalishlar belgilandi.
Asosiy maqsadlardan biri — o‘zbek modernizmiga mansub arxitektura yodgorliklarini UNESCOning Butunjahon merosi ro‘yxatiga kiritish uchun zarur materiallarni tayyorlash. Shuningdek, Toshkentni mozaik pannolar soni bo‘yicha dunyoda yetakchi shahar sifatida xalqaro miqyosda tan olishga erishish rejalashtirilgan.
Bu vazifalarni Madaniyat va san’atni rivojlantirish jamg‘armasi, Madaniy meros agentligi hamda Turizm qo‘mitasiga 2028 yilgacha bajarish yuklatildi.
Toshkent mozaikalari shaharning o‘ziga xos ramzlaridan biri hisoblanadi. Ushbu an’ana 1966 yilgi zilziladan so‘ng paydo bo‘lgan.
