«OpenAI»дан кейинги ҳаёт: «Microsoft» янги СИ-стартаплар овини бошлади

«Microsoft» сунъий интеллект соҳасида сотиб олиш мумкин бўлган стартапларни излашни бошлади. Бу компаниянинг асосий ҳамкори – «OpenAI»дан мустақил келажакка тайёргарлик кўриш мақсадида амалга оширилмоқда, деб хабар берди «Reuters» манбаларига таяниб.

Уч нафар манбанинг айтишича, янги битимлар корпорацияга иқтидорли дастурчиларни жалб қилиш ва келаси йилгача ўзининг илғор СИ-моделини яратиш бўйича эълон қилинган мақсадни амалга оширишга ёрдам бериши кутилмоқда.


«Microsoft» кимни сотиб олишни режалаштирмоқда

Бу баҳорда технологик гигант «Cursor» стартапини сотиб олиш имкониятини кўриб чиққан. Компания СИ ёрдамида дастур кодини генерация қилишга ихтисослашган.

Бироқ битимдан воз кечишга тўғри келган. «Reuters» манбаларига кўра, юристлар харид антимонополия регуляторлари текширувидан ўтмаслиги мумкин деб ҳисоблаган, чунки «Microsoft» аллақачон бунга ўхшаш «GitHub Copilot» хизматига эгалик қилади.

Агентлик маълумотига кўра, ҳозир корпорация «Inception» лойиҳаси билан музокара олиб бормоқда. Стартап 2024-йилда Станфорд университети жамоаси томонидан ташкил этилган бўлиб, катта тил моделларини яратишнинг муқобил усулини ривожлантирмоқда. 2025-йил охирида M12 – «Microsoft» венчур фонди – ушбу стартапнинг 50 миллион долларлик илк инвестиция раундида қатнашган.

«Reuters» қайд этишича, музокаралар давом этмоқда, аммо битим муваффақиятли якунланишига кафолат йўқ. «Inception» эса вазиятга изоҳ бермаган.

«Microsoft» ҳаддан ташқари қизиб кетган бозорда сармоя киритишга мажбур бўлмоқда. Бу ерда стартаплар жуда юқори баҳоланмоқда, СИ тадқиқотчилари маоши эса бир йилда ўнлаб миллион долларга етиши мумкин.
Икки манбанинг айтишича, вазиятни бошқа технологик гигантлар билан тўғридан тўғри рақобат ҳам мураккаблаштирмоқда. Аввало, «SpaceX» билан.

Илон Маскнинг аэрокосмик компанияси «Cursor» билан 60 миллиард долларлик битимни «Microsoft» музокаралардан чиққанидан кўп ўтмай эълон қилди.

Эксклюзивликнинг тугаши

«Microsoft» ва «OpenAI» ўртасидаги ҳамкорлик 2019-йилда бошланган. Ўшанда IT-гигант ҳали кенг танилмаган тадқиқот лабораториясига 1 миллиард доллар сармоя киритган эди.

2022-йил охирида «ChatGPT» чиқарилиши «Microsoft»га сунъий интеллект соҳасидаги илк етакчилардан бири мақомини берди ва унинг «Microsoft Azure» булутли бизнесининг кескин ўсишига сабаб бўлди.
Сўнгги молиявий ҳисоботга кўра, «Microsoft» ҳамкорига ваъда қилинган 13 миллиард доллардан 11,8 миллиард долларини ўтказган.

Шу билан бирга, корпорациянинг умумий харажатлари – «OpenAI»га инвестициялар, инфратузилма яратиш ва хостингни қўшганда – 100 миллиард доллардан ошган. Бу ҳақда 13-май куни судда «Microsoft» корпоратив ривожланиш бўлими раҳбари Майкл Веттер маълум қилди.

Дастлабки келишув «Microsoft»га технологияларга эксклюзив кириш ҳуқуқини, «OpenAI»га эса тадқиқотлар учун «Microsoft» серверларидан барқарор фойдаланиш имконини берган.

Вақт ўтиши билан ҳамкорлар ўртасидаги таранглик кучайди, чунки ҳар икки томон шартнома чекловларидан норози бўла бошлади.

«Reuters» таъкидлашича, «OpenAI»нинг ҳисоблаш қувватига бўлган эҳтиёжлари «Microsoft» тақдим эта оладиган даражадан ошиб кетган. Шу билан бирга, шартнома корпорациянинг ҳамкор ишланмаларига рақобатчи бўлиши мумкин бўлган нейротармоқлар яратишини тақиқлаган.

Натижада компаниялар ҳамкорлик шартларини бир неча марта юмшатишга мажбур бўлди.
2025-йил охиридаги ўзгартишлар «Microsoft»га универсал сунъий интеллект – ҳозирча назарий ҳисобланган, мураккаб вазифаларни ечишда инсондан устун СИ шаклини (AGI) яратишга рухсат берди.

Апрел ойи охирида эса томонлар янги келишув имзолади. У «OpenAI»га айрим маҳсулотларни «Amazon» ва «Microsoft»нинг бошқа тўғридан тўғри рақобатчилари билан бирга ишлаб чиқиш имконини берди.