Ўзбекистон IT бозорида етакчи давлатлар рўйхати эълон қилинди

Ўзбекистонда 2026 йил 1 март ҳолатига мамлакатда IT ва алоқа соҳасида 1 242 та хорижий корхона фаолият юритмоқда.

Ўзбекистонда IT ва алоқа корхона очган мамлакатлар

Россия компаниялари етакчиликни сақлаб қолмоқда. Уларнинг сони 457 тага етган бўлиб, бу умумий кўрсаткичнинг салмоқли қисмини ташкил этади. Бу ҳолат иқтисодий алоқаларнинг яқинлиги ва IT соҳасидаги ҳамкорликнинг юқори даражада эканини кўрсатади.

Иккинчи ўринни Қозоғистон эгаллаб, 113 та корхона билан иштирок этмоқда. Шунингдек, Беларус (63 та), АҚШ (58 та) ва Туркия (51 та) ҳам Ўзбекистон IT бозорида фаол иштирок этаётган давлатлар қаторига киради.

Осиё давлатлари ҳам ушбу йўналишда ўз улушини оширмоқда. Хитойдан 40 та, Бирлашган Араб Амирликларидан 32 та, Япониядан 30 та, Тожикистондан 29 та ва Жанубий Кореядан 28 та корхона фаолият юритмоқда.

Бошқа давлатлар ҳиссасига эса 341 та корхона тўғри келади. Бу эса Ўзбекистон IT бозорининг географияси кенгайиб, турли минтақалардан инвесторлар жалб этилаётганини англатади.

Мутахассислар фикрича, рақамли иқтисодиётни ривожлантиришга қаратилган ислоҳотлар, IT-парклар ва солиқ имтиёзлари хорижий компаниялар учун қулай муҳит яратиб бермоқда.