O‘zbekistonda 14 ta yangi «Yashil» texnikum ochilmoqda
Texnikumlarning eng iqtidorli o‘quvchilari uchun maxsus «Eko-stipendiya» joriy qilinadi.
O‘zbekistonning barcha hududlarida ekologiya va atrof-muhitni muhofaza qilish sohasida mutaxassislar tayyorlaydigan 14 ta yangi «Yashil» texnikum faoliyati yo‘lga qo‘yiladi. Prezident Shavkat Mirziyoyevning tegishli qaroriga asosan, 2030-yilga qadar ushbu ta’lim maskanlarida 10 ming nafar zamonaviy eko-kadrlar yetishtirib chiqarilishi belgilangan.
Texnikumlarning eng iqtidorli o‘quvchilari uchun maxsus «Eko-stipendiya» joriy qilinadi va ularga har oy kamida mehnatga haq to‘lashning eng kam miqdorida stipendiya to‘lanadi.
O‘quvchilar tabiat qo‘riqxonalari, o‘rmon xo‘jaliklari va botanika bog‘larida real amaliyot o‘taydi. Oliy ta’limning yuqori bosqichlarida amaliy mashg‘ulotlar ulushi 80 foizgacha yetadi.
Ingliz tilini yaxshi bilgan (B2) va yuqori baholarga o‘qigan bitiruvchilar «Green University»ning 2-bosqichidan o‘qishni davom ettirishlari mumkin bo‘ladi.
Ta’kidlanishicha, bu tashabbus yoshlar uchun yangi ish o‘rinlari va zamonaviy kasblarni egallash imkoniyatini yaratadi. Eng muhimi, mamlakat ekologiyasini asrab-avaylaydigan, tabiat bilan uyg‘un ishlay oladigan yangi avlod mutaxassislarini yetishtirib beradi.
