Тадбиркорларнинг 42 фоизи қарз мажбуриятлари ошганини билдирди – Бизнес кайфияти шарҳи
Корхоналарнинг ишлаб чиқариш ҳажмини кўпайтириши учун кредит ва ишчи кучига эҳтиёж ортмоқда. Хусусан, Марказий банк сўровномасида иштирок этган тадбиркорларнинг 42 фоизи қарз мажбуриятлари ошганини, 48 фоизи эса ишчи кучига талаб кучайганини билдирган. Келгусида бизнес шароитлари яхшиланишига ишонаётганлар улуши эса бир йил ичида 66 фоиздан 82 фоизга кўтарилган.
© Ijtimoiy tarmoqlarЎзбекистонда тадбиркорларнинг кредитга эҳтиёжи ортмоқда. Сўнгги уч ойда бизнес субъектларининг 42 фоизи қарз мажбуриятлари ошганини билдирган, 45 фоизи эса келгусида қарзлари янада кўпайишини кутмоқда. Бу ҳақда Марказий банкнинг 2026-йил II чорак якунлари бўйича Бизnes кайфияти шарҳида келтирилган.
Сўров натижаларига кўра, тадбиркорларнинг кредит ресурсларига эҳтиёжи айниқса қурилиш, ишлаб чиқариш, қишлоқ хўжалиги, туризм ва умумий овқатланиш соҳаларида юқори бўлмоқда.
Келгуси чоракда Навоий, Қашқадарё, Андижон ва Жиззах вилоятларида кредит ресурсларига талаб сезиларли ошиши кутилмоқда. Аксинча, Фарғона, Тошкент ва Бухоро вилоятларида кредитга эҳтиёж пасайиши ёки ўзгаришсиз қолиши прогноз қилинган.
Бизнес муҳити яхшиланган
Шу билан бирга, тадбиркорлик муҳитига ижобий баҳо бераётган бизнес субъектлари улуши ҳам ошган. 2026-йил II чорак якунлари бўйича сўровда қатнашган тадбиркорларнинг 64 фоизи бизнес шароитлари яхшиланганини билдирган. Бир йил аввал бу кўрсаткич 61 фоизни ташкил этган.
Тадбиркорлар ижобий ўзгаришларни, аввало, банк хизматлари сифати ва рақобат муҳитининг яхшилангани, лицензия олиш жараёнларининг соддалашгани ҳамда йўл инфратузилмасидаги ўзгаришлар билан изоҳлаган.
Шу билан бирга, монополлашув даражаси, маъмурий аралашувлар, энергия таъминоти ва божхона тарифлари бўйича сезиларли ўзгариш кузатилмаган.
Буюртмалар ва ишлаб чиқариш фаоллиги ошган
II чоракда буюртмалари кўпайганини билдирган тадбиркорлар улуши 56 фоизни ташкил этди. Бу кўрсаткич Самарқанд, Қашқадарё, Жиззах, Навоий ва Хоразм вилоятларида юқорироқ бўлган.
Ижобий динамикага асосан қурилиш, туризм, умумий овқатланиш, ҳунармандчилик ва ишлаб чиқариш соҳалари ҳисса қўшган.
Юқори қувватларда ишлаётган корхоналар улуши ҳам бир йил ичида 50 фоиздан 58 фоизгача ошган. Фарғона, Наманган, Қашқадарё вилоятлари ва Тошкент шаҳрида бу кўрсаткич юқори бўлган.
Бироқ энергия таъминотидаги узилишлар, ички талабнинг етарли эмаслиги, автомобил ёқилғиси нархининг ошиши ва етказиб беришдаги узилишлар корхоналарнинг тўлиқ қувватда ишлашига тўсқинлик қилаётган асосий омиллар сифатида қайд этилган.
Ишчи кучига талаб ошмоқда
II чоракда тадбиркорларнинг 48 фоизи ишчи кучига талаб ошганини билдирган.
Келгуси чоракларда Хоразм, Самарқанд, Жиззах ва Сирдарё вилоятларида қўшимча ишчи кучига талаб юқори бўлиши кутилмоқда. Ишлаб чиқариш, қурилиш, туризм ва молия соҳаларида ҳам янги ходимларга эҳтиёж бошқа тармоқларга нисбатан юқорироқ бўлиши прогноз қилинмоқда.
Тадбиркорларнинг иқтисодиётга ишончи ошган
2026-йил II чорагида сўровда қатнашган бизнес субъектларининг 82 фоизи келгусида макроиқтисодий шароитлар яхшиланишини кутаётганини билдирган. Бир йил аввал бу кўрсаткич 66 фоиз эди.
Шундай қилиб, тадбиркорларнинг бизнес муҳитига ва мамлакат иқтисодиётига ишончи ошаётган бир пайтда, кредит ва қарз маблағларига эҳтиёж ҳам юқори даражада қолмоқда. Энергия таъминоти, ички талаб, ёқилғи нархлари ва логистика билан боғлиқ муаммолар эса бизнес фаоллигига таъсир қилаётган асосий омиллар қаторида қолмоқда.
