Moskvada portlash: Putinga yaqin general halok bo‘ldi
Moskva markazida sodir bo‘lgan avtomobil portlashida Rossiya armiyasida muhim lavozimda ishlagan general halok bo‘ldi va hodisa bo‘yicha keng ko‘lamli tergov boshlandi.
Rossiya poytaxti Moskva shahrida sodir bo‘lgan portlash oqibatida Rossiya Qurolli kuchlarining yuqori lavozimli ofitserlaridan biri — general Fanil Sarvarov halok bo‘ldi. Hodisa 22-dekabr kuni ertalab soat 07:00 atrofida ro‘y bergan. Portlovchi modda 56 yoshli general harakatlanayotgan «KIA Sorento» avtomobiliga o‘rnatilgani aytilmoqda.
Rasmiy ma’lumotlarga ko‘ra, portlashdan so‘ng avtomobil jiddiy zarar ko‘rgan, Sarvarov esa og‘ir ahvolda shifoxonaga yetkazilgan. Biroq shifokorlar ko‘rsatgan barcha yordamga qaramasdan, u shifoxonada vafot etgan. Manbalar general Rossiya Mudofaa vazirligi tizimida harbiy tayyorgarlik va operativ o‘quv ishlari uchun javobgar bo‘lganini ma’lum qilmoqda.
Rossiya prezidenti Vladimir Putinga yaqin harbiy kadr sifatida tanilgan Sarvarov mamlakat armiyasida muhim figura hisoblangan. Uning faoliyati, ayniqsa, urush sharoitida kadrlar tayyorlash va jangovar shaylik masalalari bilan bog‘liq bo‘lgan.
Hodisa yuzasidan Moskva bosh prokuraturasi jinoiy ish qo‘zg‘atib, tergovni o‘z nazoratiga oldi. Rasmiy bayonotda portlash sodir bo‘lgan hududda huquqni muhofaza qiluvchi idoralar ishi muvofiqlashtirilayotgani bildirildi. Tergov portlash sabablari va unga kimlar aloqador ekanini aniqlashga qaratilgan.
Norasmiy manbalarga ko‘ra, general Sarvarov avvalroq Checheniston, Janubiy Osetiya, Suriya va Ukrainadagi harbiy operatsiyalarda ishtirok etgan. Mutaxassislar ushbu hodisani Rossiyadagi xavfsizlik vaziyati uchun jiddiy signal sifatida baholamoqda.
Hozircha rasmiy idoralar portlashning ortida kim turgani yoki uning ehtimoliy motivlari haqida ma’lumot bermadi. Tergov natijalari yaqin kunlarda e’lon qilinishi kutilmoqda.
