Таҳлилларга кўра, бу даврда экспорт ҳажми 29,1 фоизга кўпайиб, 16,8 млрд долларни ташкил этди. Импорт эса 7 фоизга ўсиб, 20,1 млрд долларга етди. Натижада ташқи савдонинг дефицити 3 млрд 246 млн долларгача қисқарди.
Ташқи савдода халқаро ҳамкорлар ким?
Ўзбекистон бугунги кунда дунёнинг 194 давлати билан ташқи савдо алоқаларини олиб бормоқда. 2025 йилнинг биринчи ярмида ташқи савдо айланмасининг энг катта улуши Хитой (17,7 фоиз), Россия (16,3 фоиз), Қозоғистон (6,0 фоиз), Туркия (3,6 фоиз) ва Корея Республикасига (2,3 фоиз) тўғри келди.
Экспорт
Биринчи ярим йилликда экспорт таркибидаги товарлар умумий экспортнинг 76 фоизини ташкил этган. Улар орасида қуйидагилар асосий ўринни эгаллаган:
- Саноат маҳсулотлари — 10,9 фоиз;
- Озиқ-овқат маҳсулотлари ва тирик ҳайвонлар — 7,2 фоиз;
- Кимёвий моддалар ва уларга ўхшаш маҳсулотлар — 5,8 фоиз;
- Минерал ёқилғи ва мойлаш материаллари — 4,3 фоиз;
- Турли хил тайёр буюмлар — 4,1 фоиз.
2025 йилнинг январ-июн ойларида Ўзбекистоннинг товар ва хизматлар экспортидаги асосий савдо ҳамкорлари Россия (12,1 фоиз), Хитой (5,4 фоиз), Қозоғистон (4 фоиз), Афғонистон (3,6 фоиз), Туркия (3 фоиз), Франция (2,9 фоиз), Бирлашган Араб Амирликлари (1,8 фоиз), Қирғизистон (1,6 фоиз), Тожикистон (1,4 фоиз) ва Покистон (1,1 фоиз) бўлди. Ушбу давлатларнинг умумий экспортдаги улуши 36,8 фоизни ташкил этди.
«Ой давомида олтинсиз экспорт 16,1 фоизга, олтин, энергия товарлари ҳамда хизматларсиз экспорт эса 15,8 фоизга ўсган. Таққослаш учун, май ойида олтинсиз экспорт 9,6 фоизга ўсган бўлса, олтин, энергия товарлари ҳамда хизматларсиз экспорт 1,1 фоизга қисқарган эди», — деб ёзмоқда иқтисодчи Миркомил Холбоев.
Бундан ташқари, ўтган олти ой давомида Ўзбекистон томонидан 355 млн долларлик газ экспорт қилинди — бу ўтган йилнинг шу даврига нисбатан 50,5 фоизга кўп. Шу ўринда, 277 млн долларлик нефт ва нефт маҳсулотлари экспорт қилиниб, бу йўналишда 1,9 фоиз пасайиш кузатилди. Электр энергияси экспорти эса 100 млн долларни ташкил этиб, 52,5 фоизга ошди.
Импорт
Ўзбекистоннинг 2025-йил январ-июн ойларидаги импорт ҳажми 20 млрд 133 млн долларга етиб, 2024-йилнинг шу даврига нисбатан 7 фоизга ошди.
Импорт таркибида энг катта улуш машина ва транспорт ускуналари (32,9 фоиз), саноат маҳсулотлари (16 фоиз), ҳамда кимёвий воситалар ва шунга ўхшаш маҳсулотлар (12,9 фоиз) ҳиссасига тўғри келди.
Умумий импортнинг 2/3 қисми 7 та давлатдан амалга оширилган:
- Хитой — 5 млрд 650 млн доллар;
- Россия — 3 млрд 977 млн доллар;
- Қозоғистон — 1 млрд 533,9 млн доллар;
- Туркия — 832 млн доллар;
- Корея Республикаси — 816 млн доллар;
- Германия — 589 млн доллар;
- Ҳиндистон — 539 млн доллар.
«Импортнинг ўсишида Хитой муҳим рол ўйнамоқда. Хусусан, июн ойида Хитойдан ойлик импорт 52 фоизга ўсган. Ўзи умуман АҚШ томонидан янги тарифлар тўлқини жорий қилиши арафасида савдо уруши Хитойдан импортнинг ўсишига олиб келиши тахмин қилгандим. Айни апрел ойидан буён Хитойдан импорт нисбатан юқори суръатларда ўсмоқда», — деб Холбоев ўз блогида таъкидлаган.
Йилнинг дастлабки олти ойида газ импорти қисқарди. Ҳисобот даврида Ўзбекистон томонидан 572 млн долларлик газ харид қилинди — бу 2024-йилги шу давр кўрсаткичининг атиги 70 фоизини ташкил этди. Бироқ июн ойининг ўзида 286 млн долларлик газ импорти амалга оширилди. Бу эса январ-май ойларидаги умумий ҳажмдан ҳам юқори бўлди.
Аввалроқ, ташқи савдо бозорида нималар сотилгани ҳақида дастлабки маълумотларни берган эдик.
Маҳлиё Ҳамидова тайёрлади.