Киев областидаги иссиқхоналардан бирида 13 нафар Ўзбекистон Республикаси фуқароси оғир шароитда мажбурий меҳнатга жалб этилгани ҳақида хабар берган эдик. Ўзбекистоннинг Украинадаги элчихонаси ҳолат юзасидан маълумот берди.
Қайд этилишича, вазиятга ойдинлик киритиш мақсадида элчихона вакиллари воқеа жойига ташриф буюрган.
«Айни пайтда барча фуқароларимизнинг соғ-саломатлиги аниқланиб, уларни тегишли тиббий муолажа қилиш учун Киев вилоятидаги маҳаллий шифохоналардан бирига жойлаштирилган. Элчихона томонидан фуқароларимиз билан боғлиқ бўлган вазият тўлиқ назоратга олинган бўлиб, уларни Ўзбекистонга қайтариш бўйича барча керакли чора-тадбирлар амалга оширилмоқда», — дейилади хабарда.
Шу жумладан, ўзбекистонликларга тегишли консуллик ва ҳуқуқий ёрдамни амалга ошириш мақсадида Украина ТИВ ва Бош прокурори офисига тегишли ноталар юборилган. Мазкур холат юзасидан жиноий иш очилиб, гумонланувчилар устидан суд жараёни бўлиб ўтмоқда.
«Элчихона фуқароларимизнинг ҳуқуқ ва манфаатларини ҳимоя қилиш, уларга ҳар томонлама ёрдам кўрсатиш ҳамда қонуний ҳуқуқларини тиклаш борасида барча зарур чора-тадбирларни кўришда давом этмоқда. Ўз навбатида, Украинада инсон хаёти учун хавф туғдириши мумкин бўлган ҳолатлар кузатилаётгани боис Ўзбекистон фуқароларидан ўз хавфсизлигини инобатга олган ҳолда мазкур мамлакатга айни вақтда ташрифларни режалаштирмасликларини тавсия қиламиз», — дейилади хабарда.
Маълумот учун, мазкур иш доирасида Хитой Халқ Республикасининг икки нафар фуқароси, бир нафар ўзбекистонлик ва бир нафар украиналик аёл қўлга олинган.
Қурбонлар четдан Киев областига олиб келинган ва фойда топиш мақсадида қул сифатида ишлатилган. Жиноятчилар қурбонларни назорат қилиш учун уларнинг эркин ҳаракатланишини чеклаган, доимий мажбурлаш ва таҳдидлар орқали уларни эксплуатация қилган. Ҳатто ҳожатхонага бориш ҳам белгиланган жадвал асосида амалга оширилган, энг кичик қоидабузарлик учун эса жазолар қўлланилган.
Жиноий гуруҳ 2 ёшдан 42 ёшгача бўлган 13 нафар Ўзбекистон фуқаросини топиб, уларга юқори иш ҳақи ваъда қилишган. Украинага келганларидан сўнг, уларнинг паспортлари тортиб олинган ва Киев областидаги икки қишлоқ хўжалиги корхонасида мажбурий меҳнатга жалб қилиниб, ноқонуний ушлаб турилган. Хабарда таъкидланишича, жабрланувчиларнинг меҳнат ва яшаш шароитлари «ниҳоятда таҳқирловчи» бўлиб, уларнинг ҳаракатланиши қаттиқ назорат остида чекланган.