Ўзбекистон ФИФА рейтингида 10 поғона пастлади
Жаҳон чемпионатидаги омадсиз иштирокдан кейин Ўзбекистон миллий терма жамоаси ФИФА рейтингида 60-ўринга тушиб кетди.
© ufa2026 йилги Жаҳон чемпионатидаги иштирокидан сўнг Ўзбекистон миллий терма жамоасининг ФИФА рейтингидаги ўрни пасайди.
Ташкилотнинг онлайн рейтингига кўра, Ўзбекистон 50-ўриндан 60-ўринга тушиб кетган. Терма жамоа қарийб 49 рейтинг очко йўқотган ва ҳозирда 1409,73 баллга эга.
Ўзбекистон терма жамоаси бундай натижа билан Саудия Арабистони ва Қатардан кейинги поғонадан жой олган.
ФИФАнинг жорий онлайн рейтингида Аргентина 1907,40 балл билан пешқадамлик қилмоқда. Кучли учликни эса Франция ва Испания терма жамоалари эгаллаб турибди.
Омадсиз дебют
Рейтингдаги пасайиш Ўзбекистон терма жамоасининг Жаҳон чемпионатидаги омадсиз иштирокидан кейин кузатилди.
Терма жамоа К гуруҳида учала учрашувда ҳам мағлубиятга учради. Мамлакат Колумбияга 1:3, Португалияга 0:5 ва Конго Демократик Республикасига 1:3 ҳисобида имкониятни бой берди.
Учрашувлар якуни бўйича Ўзбекистон икки гол урди, ўз дарвозасидан эса 11 та тўп ўтказиб юборди. Жамоа гуруҳда охирги ўринни эгаллаб, плей-офф босқичига чиқа олмади.
Рейтинг ҳали расмий эмас
Эълон қилинган кўрсаткичлар ФИФАнинг онлайн ҳисоб-китобларига асосланган бўлиб, ҳозирча дастлабки рейтинг ҳисобланади.
ФИФА рейтингининг навбатдаги расмий янгиланиши 20 июл куни эълон қилиниши режалаштирилган. Шунга қадар жамоаларнинг амалдаги ўринлари ўзгариши мумкин.
Аввалроқ, Ўзбекистон миллий терма жамоанинг россиялик собиқ мураббийи Валерий Непомняши Жаҳон чемпионатида Ўзбекистон термасини Темур Кападзе бошқариши керак бўлганлигини, Фабио Канавваро эса футболчиларнинг салоҳиятини тўғри баҳолай олмаганини айтган эди.
