Beeline Uzbekistan эгаси Perfectum лойиҳасига 200 млн доллар киритиши мумкин
Perfectum инвестори Фарҳод Мамажонов инвестиция битимини имзолаш учун ҳозирча Рақобат қўмитаси хулосаси кутилаётганини маълум қилди.
© o'zbekiston 24Тадбиркор Фарҳод Мамажонов Ўзбекистондаги телекоммуникация лойиҳасига 200 миллион доллар инвестиция жалб қилиш бўйича VEON халқаро телекоммуникация холдинги билан келишувларга эришилганини маълум қилди. Бу ҳақда у 18-август куни Хоразм вилоятида президент Шавкат Мирзиёев билан ўтказилган тадбиркорлар учрашувида айтди.
Фарҳод Мамажонов — InfinBank’нинг энг йирик акциядори ҳамда Perfectum мобил операторининг инвесторларидан бири.
Vodafone ўрнига VEON
Тадбиркорнинг айтишича, у тахминан икки йил аввал Қорақалпоғистонда президент билан ўтказилган учрашувда Британиянинг Vodafone компаниясини Ўзбекистондаги телекоммуникация лойиҳасига жалб қилиш режалари ҳақида маълумот берган.
Бироқ кейинчалик лойиҳа бўйича ҳамкор сифатида Vodafone эмас, Нидерландияда рўйхатдан ўтган VEON компанияси билан ишлашга қарор қилинган.
«Бир ёки икки йил олдин Қорақалпоғистондаги учрашувда сизга Vodafone’ни жалб қилиш режалари ҳақида хабар берган эдим. Бироқ бунинг ўрнига биз Нидерландиянинг VEON компанияси билан ишлашни бошладик», — деди Мамажонов.
VEON халқаро телекоммуникация холдинги бўлиб, унинг таркибига Ўзбекистондаги Beeline Uzbekistan ҳам киради. Beeline Uzbekistan VEON UZB Holding Ltd орқали VEON гуруҳига тегишли.
Мамажоновнинг сўзларига кўра, томонлар июн ойидаёқ асосий келишувларга эришган ва VEON 200 миллион долларлик инвестиция жалб қилиш бўйича битимни имзолашга тайёр.
Аммо бунинг учун аввал Рақобатни ривожлантириш ва истеъмолчилар ҳуқуқларини ҳимоя қилиш қўмитасининг иқтисодий концентрация бўйича хулосаси олиниши керак.
«Ҳозир битта масала қолмоқда. Июн ойида биз барча келишувларга эришдик, улар 200 миллион долларлик инвестицияларни жалб қилиш бўйича битимни имзолашга тайёр. Бизга Рақобатни ривожлантириш қўмитасининг хулосасини олишда ёрдам керак», — деди тадбиркор.
Қўмита хулосаси тадбиркорлар кунигача берилиши мумкин
Шундан сўнг президент учрашувда Рақобатни ривожлантириш қўмитаси вакили иштирок этаётгани билан қизиқди.
Қўмита раиси Ҳалилулла Тўрахўжаевнинг маълум қилишича, 24-июл куни иқтисодий концентрация бўйича битимга олдиндан розилик олиш юзасидан мурожаат келиб тушган.
Ҳозирда қўмита мобил алоқа бозорини ўрганмоқда. Қўмита раҳбарининг айтишича, айрим масалалар ишлаб чиқилгач, агар қўшимча тўсиқлар юзага келмаса, тадбиркорлар кунигача тегишли хулоса берилиши мумкин.
«Ҳозирда биз мобил алоқа бозорини ўрганяпмиз. Бир-иккита жиҳатни ишлаб чиқиш қолди. Агар ҳаммаси яхши бўлса, тадбиркорлар кунигача хулоса берамиз», — деди Ҳалилулла Тўрахўжаев.
Президент Шавкат Мирзиёев ушбу масалани шахсан назоратга олишини маълум қилди.
«Яхши, Фарҳод, бу масалани ўзим назоратга оламан», — деди давлат раҳбари.
Мамажонов Perfectum’нинг 50 фоиз улушини сотиб олган
Фарҳод Мамаджонов телекоммуникация бозоридаги иштирокини бундан аввал ҳам кенгайтирган.
Рақобатни ривожлантириш қўмитаси 16-июл куни унинг Perfectum мобил операторининг юридик шахси — Rubicon Wireless Communication МЧЖ устав капиталидаги 50 фоизлик улушни сотиб олиш бўйича талабномасини маъқуллаган эди.
Корхона ва ташкилотларнинг ягона давлат реестри маълумотларига кўра, битимдан аввал компаниянинг:
● 50 фоизи Абдумалик Иминовга;
● 37,5 фоизи IMC-Capital МЧЖга;
● 12,5 фоизи Камрон Акбаровга тегишли бўлган.
Компаниянинг устав капитали 304,62 миллиард сўмни ташкил этган. Битимдан сўнг эса у 572,4 миллиард сўмга етган.
Ҳозирги вақтда Rubicon Wireless Communication муассислари орасида:
● Фарҳод Мамажонов — 50 фоиз;
● IMC-Capital — 41,23 фоиз;
● Камрон Акбаров — 8,77 фоиз улушга эга.
Perfectum 2024-йилнинг бошида тўлиқ хусусийлаштирилганди. Бироқ компания улушларининг сотилиши ҳақидаги маълумотлар очиқ манбаларда эълон қилинмаган.
Ўша вақтда операторнинг 100 фоизлик улуши Абдумалик Иминовга тегишли бўлган. Кейинчалик муассислар таркибига IMC-Capital ва Камрон Акбаров кириб, Иминовнинг улуши 50 фоизгача камайган.
Аввал 250 миллион евролик Vodafone лойиҳаси режалаштирилганди
Фарҳод Мамажонов 2024-йилнинг август ойида президент билан Нукусда бўлиб ўтган учрашувда Британиянинг Vodafone компанияси билан ҳамкорликда Ўзбекистонда 5G Standalone мобил алоқа тармоғини ишга тушириш режалари ҳақида маълум қилган эди.
Ўшанда лойиҳа қиймати 250 миллион евро этиб баҳоланган. Лойиҳани 2025-йилнинг биринчи чорагида ишга тушириш ва қарийб 1000 та янги иш ўрни яратиш режалаштирилганди.
Лойиҳа доирасида ускуна ва технологияларни Финляндиянинг Nokia компанияси етказиб бериши керак эди.
Мамажоновнинг сўзларига кўра, инвестициянинг 100 миллион евроси Финляндия экспорт агентлиги кўмагида «Ўзсаноатқурилишбанк» орқали, яна 150 миллион евроси эса муассислар маблағлари ҳисобидан жалб қилиниши режалаштирилган.
Фарҳод Мамажонов ким?
Фарҳод Мамажонов Ўзбекистондаги йирик тадбиркорлардан бири ҳисобланади. У «Infinbank»нинг асосий акциядори бўлиб, банкнинг 44,67 фоиз улушига эгалик қилади. Банкнинг қолган акциялари «PRESTIJ RIELT» МЧЖ (25,2 фоиз), Тадбиркорликни ривожлантириш компанияси (20,83 фоиз), «Азиа Транс Терминал» МЧЖ (6,45 фоиз) ва Парвиз Абдусаматовга (2,85 фоиз) тегишли.
Тадбиркорликни ривожлантириш компанияси тўлиқ давлатга тегишли бўлиб, 2025-йилда «Infinbank»нинг 15 фоизини сотиб олганди. Кейинчалик компания банкдаги улушини 19 фоиздан кўпроққа оширди. Декабр ойига келиб эса компаниянинг банкдаги улуши 23 фоизга етди.
Бундан ташқари, у «Uztex Tashkent» тўқимачилик корхонаси, «Азиа Транс Терминал» логистика компанияси, «Rakat Plaza» бизнес маркази, «Sofa Marva Tour» туризм компанияси ҳамда «Терасса» МЧЖда ҳам улушга эга.
2026-йилнинг 7-май куни у «Safo Airlines» номли янги авиакомпанияни ҳам ташкил этган. Устав капитали — 2,5 млрд сўм. Янги авиакомпаниянинг 60 фоиз улуши Фарҳод Мамажоновга, 30 фоизи Михаил Аленкинга, 10 фоизи Авазжон Тошпўлатовга тегишли.
Рақобат қўмитаси розилигидан сўнг у Perfectum мобил алоқа операторига эгалик қилувчи «Rubicon Wireless Communication» МЧЖнинг 50 фоиз улушини сотиб олиши мумкин бўлади.
