Рақобат қўмитаси VEON’нинг Perfectum’ни сотиб олиш битимига рухсат берди

Рақобат қўмитаси VEON компаниялар гуруҳига кирувчи VEON UZB Holding Ltd компаниясининг Perfectum савдо белгиси остида фаолият юритувчи Rubicon Wireless Communication АЖ акцияларининг 100 фоизини сотиб олиш бўйича аризасини кўриб чиқди.

Қўмита махсус комиссияси таҳлиллари натижасида битимга рақобатни таъминлашга қаратилган шартлар асосида олдиндан розилик бериш ҳақида қарор қабул қилди.

VEON UZB Holding Ltd Ўзбекистонда Beeline бренди остида мобил алоқа хизматларини кўрсатувчи Unitel МЧЖ ХК устав фондининг 100 фоиз улушига эга. Шу сабабли Perfectum’нинг мазкур гуруҳ томонидан сотиб олиниши телекоммуникация бозоридаги рақобат ва абонентлар манфаатлари нуқтаи назаридан алоҳида аҳамиятга эга, дейилади хабарда.

Perfectum камида уч йил алоҳида фаолият юритиши керак

Рақобат қўмитаси қарорига кўра, битим доирасида қуйидаги шартлар бажарилиши лозим:

●     Perfectum фаолиятини сақлаб қолиш. Оператор камида уч йил давомида алоҳида фаолият юритиши, шунингдек, 5G Standalone технологиясини бошқа ҳудудларга кенгайтириши керак.

●     5G FWA тарифлари ва интернет тезлиги. Амалдаги абонентлар учун 5G FWA тарифлари 12 ой давомида сақланиши, янги абонентлар учун қулай шартлар яратилиши ва интернетнинг ўртача тезлиги 300 Мбит/с дан пасайтирилмаслиги лозим.

●     Операторни эркин танлаш. Абонентларга шартнома предметига алоқадор бўлмаган шартлар мажбуран юкланмаслиги ва уларнинг бошқа мобил операторларга ўтиш эркинлиги чекланмаслиги керак.

●     Рақамли хизматлардан фойдаланишда эркинлик. Абонентлар Beeline ва VEON гуруҳига тегишли рақамли платформалардан фойдаланишга мажбурланмаслиги, рақобатчиларнинг хизматларидан фойдаланишига тўсқинлик қилинмаслиги лозим.

●     Хизмат кўрсатиш шартларини сақлаш. Абонентлар учун хизмат кўрсатиш шартлари асоссиз равишда ёмонлаштирилмаслиги ва уларнинг ҳуқуқлари ҳимоя қилиниши керак.

●     Маълумотлар хавфсизлиги. Абонентларнинг шахсий ва тижорат маълумотлари ҳимоя қилиниши, улардан рақобатни чеклаш мақсадида фойдаланилмаслиги ҳамда қонунчилик талабларига зид равишда хорижий серверларга узатилмаслиги лозим.

●     Рақобат қонунчилигига риоя этиш. Компания «Рақобат тўғрисида»ги қонун талабларига амал қилиши ва бозорда соғлом рақобат муҳитини таъминлаши керак.

Мазкур шартлар битимдан кейин абонентларнинг танлов имкониятларини сақлаш, хизматлар сифатини ҳимоя қилиш ва телекоммуникация бозорида рақобатни чеклаш хавфини камайтиришга қаратилган.

Еслатиб ўтамиз, VEON 2026-йил 19-октабрда Perfectum бренди остида фаолият юритувчи Rubicon Wireless компаниясининг 100 фоиз улушини сотиб олиш бўйича келишувга эришганини эълон қилган эди. Компания битимнинг умумий қийматини қарийб 207 млн доллар, жумладан, Perfectum’нинг тахминан 93 млн долларлик молиявий қарзини ҳисобга олган ҳолда баҳолаган.

Аввалроқ битим қиймати 200 млн доллар эди

Август ойида тадбиркор Фарҳод Мамажонов президент Шавкат Мирзиёев билан ўтказилган учрашувда Beeline Uzbekistan эгаси Perfectum лойиҳасига 200 млн доллар киритиши ҳақида маълум қилганди.

Тадбиркорнинг айтишича, у тахминан икки йил аввал Қорақалпоғистонда президент билан ўтказилган учрашувда Британиянинг Vodafone компаниясини Ўзбекистондаги телекоммуникация лойиҳасига жалб қилиш режалари ҳақида маълумот берган.

Бироқ кейинчалик лойиҳа бўйича ҳамкор сифатида Vodafone эмас, Нидерландияда рўйхатдан ўтган VEON компанияси билан ишлашга қарор қилинган.

«Бир ёки икки йил олдин Қорақалпоғистондаги учрашувда сизга Vodafone’ни жалб қилиш режалари ҳақида хабар берган эдим. Бироқ бунинг ўрнига биз Нидерландиянинг VEON компанияси билан ишлашни бошладик», — деди Мамажонов.

VEON халқаро телекоммуникация холдинги бўлиб, унинги таркибига Ўзбекистондаги Beeline Uzbekistan ҳам киради. Beeline Uzbekistan VEON UZB Holding Ltd орқали VEON гуруҳига тегишли.

Рақобат қўмитасидан хулоса олиш президент назоратида эди

Мамажоновнинг сўзларига кўра, томонлар июнь ойидаёқ асосий келишувларга эришган ва VEON 200 миллион долларлик инвестиция жалб қилиш бўйича битимни имзолашга тайёр.

Аммо бунинг учун аввал Рақобатни ривожлантириш ва истеъмолчилар ҳуқуқларини ҳимоя қилиш қўмитасининг иқтисодий концентрация бўйича хулосаси олиниши керак.

«Ҳозир битта масала қолмоқда. Июнь ойида биз барча келишувларга эришдик, улар 200 миллион долларлик инвестицияларни жалб қилиш бўйича битимни имзолашга тайёр. Бизга Рақобатни ривожлантириш қўмитасининг хулосасини олишда ёрдам керак», — деди тадбиркор.

Шундан сўнг президент учрашувда Рақобатни ривожлантириш қўмитаси вакили иштирок этаётгани билан қизиқди.

Қўмита раиси Ҳалилулла Тўрахўжаевнинг маълум қилишича, 24 июль куни иқтисодий концентрация бўйича битимга олдиндан розилик олиш юзасидан мурожаат келиб тушган.

«Ҳозирда биз мобил алоқа бозорини ўрганяпмиз. Бир-ИККИТА жиҳатни ишлаб чиқиш қолди. Агар ҳаммаси яхши бўлса, тадбиркорлар кунигача хулоса берамиз», — деди Ҳалилулла Тўрахўжаев.

Президент Шавкат Мирзиёев ушбу масалани шахсан назоратга олишини маълум қилди.

Мамажонов Perfectum’нинг 50 фоиз улушини сотиб олган

Фарҳод Мамаджонов телекоммуникация бозоридаги иштирокини бундан аввал ҳам кенгайтирган.

Рақобатни ривожлантириш қўмитаси 16 июль куни унинг Perfectum мобил операторининг юридик шахси — Rubicon Wireless Communication МЧЖ устав капиталидаги 50 фоизлик улушни сотиб олиш бўйича талабномасини маъқуллаган эди.

Корхона ва ташкилотларнинг ягона давлат реестри маълумотларига кўра, битимдан аввал компаниянинг:

●     50 фоизи Абдумалик Иминовга;

●     37,5 фоизи IMC-Capital МЧЖга;

●     12,5 фоизи Камрон Акбаровга тегишли бўлган.

Компаниянинг устав капитали 304,62 миллиард сўмни ташкил этган. Битимдан сўнг эса у 572,4 миллиард сўмга етган.

Ҳозирги вақтда Rubicon Wireless Communication муассислари орасида:

●     Фарҳод Мамажонов — 50 фоиз;

●     IMC-Capital — 41,23 фоиз;

●     Камрон Акбаров — 8,77 фоиз улушга эга.

Perfectum 2024 йилнинг бошида тўлиқ хусусийлаштирилганди. Бироқ компания улушларининг сотилиши ҳақидаги маълумотлар очиқ манбаларда эълон қилинмаган.

Фарҳод Мамажонов ким?

Фарҳод Мамажонов Ўзбекистондаги йирик тадбиркорлардан бири ҳисобланади. У «Infinbank»нинг асосий акциядори бўлиб, банкнинг 56,4 фоиз улушига эгалик қилади.

Бундан ташқари, у «Uztex Tashkent» тўқимачилик корхонаси, «Azia Trans Terminal» логистика компанияси, «Rakat Plaza» бизнес маркази, «Sofa Marva Tour» туризм компанияси ҳамда «Terassa» МЧЖда ҳам улушга эга.

2026 йилнинг 7 май куни у «Safo Airlines» номли янги авиакомпанияни ҳам ташкил этган. Устав капитали — 2,5 млрд сўм. Янги авиакомпаниянинг 60 фоиз улуши Фарҳод Мамажоновга, 30 фоизи Михаил Аленкинга, 10 фоизи Авазжон Тошпўлатовга тегишли.