VEON (Beeline Uzbekistan эгаси) халқаро телекоммуникация компанияси Ўзбекистонда Perfectum бренди остида фаолият юритувчи Rubicon Wireless компаниясининг 100 фоиз улушини сотиб олиш бўйича келишувга эришди. Бу ҳақда компания матбуот хизмати 19 октябрь куни эълон қилди.

Битимнинг умумий қиймати тахминан 207 млн долларни ташкил этади. Ушбу суммага Perfectum’нинг қарийб 93 млн долларлик мавжуд молиявий қарзи ҳам киритилган. Харид учун тўлов VEON’нинг мавжуд пул маблағлари ҳисобидан амалга оширилади.

Perfectum активлари Beeline Uzbekistan ривожлантирилади

Perfectum активлари 850 MHz ва 3 800 MHz диапазонларида жами 115 MHz частота ресурсларини, шунингдек, замонавий тармоқ ускуналари ва инфратузилмани ўз ичига олади. Улар орасида Nokia ускуналари асосида қурилган 5G Standalone тармоғи ҳам бор.

Битим якунлангач, Beeline Uzbekistan’нинг частота ресурслари ҳажми тахминан 50 фоизга ошиши кутилмоқда. Компания бу орқали тармоқ қамрови ва сиғимини яхшилаш, 5G хизматларини ривожлантириш ҳамда уйлар ва бизнес учун симсиз кенг полосали интернет таклифларини кенгайтиришни режалаштирмоқда.

Шунингдек, Perfectum инфратузилмасини Beeline Uzbekistan’нинг мавжуд тармоғига интеграция қилиш келгусидаги тармоқ инвестицияларининг самарадорлигини ошириши кутилмоқда. VEON бу жараён капитал харажатлар ва операцион харажатларни қисқартириш имкониятларини ҳам яратишини таъкидлаган.

Компания хабарига кўра, битим учун зарур тегишли тартибга солувчи органлар рухсатлари олинган. Харид жараёнини 2026 йил октябрь ойи охиригача якунлаш кутилмоқда.

Аввалроқ битим қиймати 200 млн доллар эди

Август ойида тадбиркор Фарҳод Мамажонов президент Шавкат Мирзиёев билан ўтказилган учрашувда Beeline Uzbekistan эгаси Perfectum лойиҳасига 200 млн доллар киритиши ҳақида маълум қилганди.

Тадбиркорнинг айтишича, у тахминан икки йил аввал Қорақалпоғистонда президент билан ўтказилган учрашувда Британиянинг Vodafone компаниясини Ўзбекистондаги телекоммуникация лойиҳасига жалб қилиш режалари ҳақида маълумот берган.

Бироқ кейинчалик лойиҳа бўйича ҳамкор сифатида Vodafone эмас, Нидерландияда рўйхатдан ўтган VEON компанияси билан ишлашга қарор қилинган.

«Бир ёки икки йил олдин Қорақалпоғистондаги учрашувда сизга Vodafone’ни жалб қилиш режалари ҳақида хабар берган эдим. Бироқ бунинг ўрнига биз Нидерландиянинг VEON компанияси билан ишлашни бошладик», — деди Мамажонов.

VEON халқаро телекоммуникация холдинги бўлиб, унинги таркибига Ўзбекистондаги Beeline Uzbekistan ҳам киради. Beeline Uzbekistan VEON UZB Holding Ltd орқали VEON гуруҳига тегишли.

Рақобат қўмитасидан хулоса олиш президент назоратида эди

Мамажоновнинг сўзларига кўра, томонлар июнь ойидаёқ асосий келишувларга эришган ва VEON 200 миллион долларлик инвестиция жалб қилиш бўйича битимни имзолашга тайёр.

Аммо бунинг учун аввал Рақобатни ривожлантириш ва истеъмолчилар ҳуқуқларини ҳимоя қилиш қўмитасининг иқтисодий концентрация бўйича хулосаси олиниши керак.

«Ҳозир битта масала қолмоқда. Июнь ойида биз барча келишувларга эришдик, улар 200 миллион долларлик инвестицияларни жалб қилиш бўйича битимни имзолашга тайёр. Бизга Рақобатни ривожлантириш қўмитасининг хулосасини олишда ёрдам керак», — деди тадбиркор.

Шундан сўнг президент учрашувда Рақобатни ривожлантириш қўмитаси вакили иштирок этаётгани билан қизиқди.

Қўмита раиси Ҳалилулла Тўрахўжаевнинг маълум қилишича, 24 июль куни иқтисодий концентрация бўйича битимга олдиндан розилик олиш юзасидан мурожаат келиб тушган.

«Ҳозирда биз мобил алоқа бозорини ўрганяпмиз. Бир-ИККИТА жиҳатни ишлаб чиқиш қолди. Агар ҳаммаси яхши бўлса, тадбиркорлар кунигача хулоса берамиз», — деди Ҳалилулла Тўрахўжаев.

Президент Шавкат Мирзиёев ушбу масалани шахсан назоратга олишини маълум қилди.

Мамажонов Perfectum’нинг 50 фоиз улушини сотиб олган

Фарҳод Мамаджонов телекоммуникация бозоридаги иштирокини бундан аввал ҳам кенгайтирган.

Рақобатни ривожлантириш қўмитаси 16 июль куни унинг Perfectum мобил операторининг юридик шахси — Rubicon Wireless Communication МЧЖ устав капиталидаги 50 фоизлик улушни сотиб олиш бўйича талабномасини маъқуллаган эди.

Корхона ва ташкилотларнинг ягона давлат реестри маълумотларига кўра, битимдан аввал компаниянинг:

●     50 фоизи Абдумалик Иминовга;

●     37,5 фоизи IMC-Capital МЧЖга;

●     12,5 фоизи Камрон Акбаровга тегишли бўлган.

Компаниянинг устав капитали 304,62 миллиард сўмни ташкил этган. Битимдан сўнг эса у 572,4 миллиард сўмга етган.

Ҳозирги вақтда Rubicon Wireless Communication муассислари орасида:

●     Фарҳод Мамажонов — 50 фоиз;

●     IMC-Capital — 41,23 фоиз;

●     Камрон Акбаров — 8,77 фоиз улушга эга.

Perfectum 2024 йилнинг бошида тўлиқ хусусийлаштирилганди. Бироқ компания улушларининг сотилиши ҳақидаги маълумотлар очиқ манбаларда эълон қилинмаган.

Фарҳод Мамажонов ким?

Фарҳод Мамажонов Ўзбекистондаги йирик тадбиркорлардан бири ҳисобланади. У «Infinbank»нинг асосий акциядори бўлиб, банкнинг 56,4 фоиз улушига эгалик қилади.

Бундан ташқари, у «Uztex Tashkent» тўқимачилик корхонаси, «Azia Trans Terminal» логистика компанияси, «Rakat Plaza» бизнес маркази, «Sofa Marva Tour» туризм компанияси ҳамда «Terassa» МЧЖда ҳам улушга эга.

2026 йилнинг 7 май куни у «Safo Airlines» номли янги авиакомпанияни ҳам ташкил этган. Устав капитали — 2,5 млрд сўм. Янги авиакомпаниянинг 60 фоиз улуши Фарҳод Мамажоновга, 30 фоизи Михаил Аленкинга, 10 фоизи Авазжон Тошпўлатовга тегишли.