Европа Грузия олдида эшикларини ёпди

Грузия Европа Иттифоқига аъзо бўлишга фақат расман номзод ҳисобланади. Буни Европа Иттифоқининг кенгайиш масалалари бўйича комиссари Марта Кос 4 ноябр куни Европарламентда ЕИ кенгайиши бўйича ҳисоботни тақдим этаётиб айтди. Шу билан Европа комиссияси Грузиянинг Европа интеграцияси муваффақиятсизликка учраганини амалда тан олди.

«Грузияда вазият кескин ёмонлашди, демократия жиддий орқага кетмоқда... Комиссия Грузияни фақат сўздагина номзод давлат деб ҳисобламоқда», - деди Кос евродепутатларга.

Еврокомиссиянинг таҳлилий ҳужжатида таъкидланишича, Грузия раҳбариятининг ҳаракатлари мамлакатнинг Европа йўлини хавф остига қўймоқда ва аъзоликка қўшилиш жараёнини амалда тўхтатиб қўйди. Ҳужжатда қайд этилишича, Грузияда демократия жиддий таназзулга учради, қонун устуворлиги тезда емирилмоқда, аҳолининг асосий ҳуқуқлари эса қаттиқ чекланмоқда.

Еврокомиссия Грузия ҳукуматини тизимли репрессияларда, жумладан, фуқаролик маконини торайтирувчи қонунлар қабул қилишда, мустақил оммавий ахборот воситалари фаолиятини чеклашда, ЛГБТ ҳамжамиятини таъқиб қилишда ва ҳуқуқ-тартибот идоралари томонидан ҳаддан ташқари куч ишлатишда айблади.

«Ҳукумат йўналишни ўзгартириш ва мамлакатни Европа йўлига қайтариш учун ҳеч қандай чора кўрмади. Етакчи мухолифатчиларнинг қамоққа олиниши, шунингдек, ҳукмрон партиянинг айрим мухолифат партиялари ва уларга алоқадор шахсларни тақиқлаш ниятини эълон қилиши демократик плюрализмга тўғридан-тўғри ҳужум ҳисобланади», - дейилади ҳужжатда.

Шу билан бирга, Грузия ташқи ишлар вазири Мака Бочоришвилининг фикрича, Брюсселнинг Грузияга берган баҳолари сўнгги пайтларда бир томонлама характерга эга. Шу муносабат билан Тбилисида Еврокомиссия ҳисоботи мамлакат эришган тараққиётни тўлиқ акс эттирмайди, деб ҳисоблашмоқда.

2024 йил декабр ойида Грузия ҳукумати ўзи мамлакатнинг Европа Иттифоқига қўшилиш жараёнини 2028 йилгача тўхтатган эди.

«Ўшандан бери вазият сезиларли даражада ёмонлашди», - дея таъкидлади Еврокомиссия.

Грузиянинг муваффақиятсизлиги фонида Европа комиссари тўртта ислоҳот етакчиси мамлакатни ажратиб кўрсатди.

«Черногория, Албания, Украина ва Молдова алоҳида ажралиб туради. Улар ўтган йил давомида ислоҳотларда энг кўп олдинга силжишди», - деди Кос.

Етакчи давлатлар аъзолик музокараларини якунлаш бўйича аниқ режаларга эга.

«Номзодларимизнинг мақсадлари жуда улкан. Черногория музокараларни 2026 йил охирида, Албания - 2027 йил охирида, Молдова ва Украина - 2028 йилда якунламоқчи», - дея таъкидлади Европа комиссари.

Коснинг сўзларига кўра, баъзи номзод мамлакатларнинг ислоҳотлар суръатини ҳисобга олган ҳолда, «Европа Иттифоқининг яқин йилларда муваффақиятли кенгайиши тўла ҳақиқатга айланиши мумкин».

«Келгуси йил барча номзод давлатлар учун, айниқса, музокараларни якунлаш бўйича улкан режаларни тақдим этган давлатлар учун ҳақиқат лаҳзаси бўлади», - дея қўшимча қилди у.