Mojtaba Xamenei sog‘lommi? Eron oliy rahbarining g‘oyib bo‘lishiga izoh berildi
Eronning BMTdagi vakili Mojtaba Xameneining sog‘lig‘i haqidagi xabarlarga munosabat bildirdi. Yangi oliy rahbar nima uchun ommaga ko‘rinish bermayotgani va uning hozirgi holati haqida batafsil ma’lumot.
9-mart kuni Amerika-Isroil qo‘shma zarbalari oqibatida halok bo‘lgan otasi Ali Xomanaiyning vorisi sifatida Eronning yangi oliy rahbari etib saylangan 56 yoshli Mo‘jtabo Xomanaiy sog‘lom va mamlakatni muvaffaqiyatli boshqarmoqda. Bu haqda Eronning BMTdagi vakili Ali Bahreyni ma’lum qildi.
Uning ta’kidlashicha, oliy rahbarning jamoatchilik oldida ko‘rinmayotgani faqat xavfsizlik choralari bilan bog‘liq.
«Uning ommaga ko‘rinish bermayotganiga sabab — hozirgi alohida sharoitlar tufayli xavfsizlik choralariga rioya qilinayotganidir», — dedi Ali Bahreyni.
Ma’lumotlarga ko‘ra, Mo‘jtabo Xomanaiy o‘tgan oyda otasi halok bo‘lganidan beri xalq orasida ko‘rinmagan. U hozirgacha faqat yozma bayonotlar e’lon qilish bilan cheklanmoqda.
Yangi rahbar saylanganidan so‘ng, tez orada uning yaralangani haqida xabarlar tarqalgan edi. Bu ma’lumotni avvaliga mamlakat prezidentining o‘g‘li rad etdi. Biroq keyinroq Islom respublikasi Tashqi ishlar vazirligi vakili Esmail Bagai yangi oliy rahbar haqiqatan ham jarohat olgani, ammo o‘zini yaxshi his qilayotganini bildirgandi.
17-mart kuni Eron Tashqi ishlar vazirligi yangi rahbar tez orada xalqqa murojaat bilan chiqishini ma’lum qildi. Shunga qaramay, 20-mart kuni AQSH milliy razvedkasi rahbari Tulsi Gabbard Mo‘jtabo Xomanaiy og‘ir jarohat olgani haqida bayonot berdi.
