Ипотека компанияси 700 млрд сўмлик облигацияларни чиқарди
«Ўзбекистон ипотекани қайта молиялаштириш компанияси» 700 миллиард сўмлик облигацияларни муомалага чиқарди. Бу эмиссия компания тарихидаги энг йирик жойлаштириш сифатида қайд этилди.
© mfd.mos.ru«Тошкент» республика фонд биржаси «Ўзбекистон ипотекани қайта молиялаштириш компанияси»нинг навбатдаги корпоратив облигациялар чиқарилишини котировка рўйхатига киритди. Бу ҳақда биржа матбуот хизмати хабар берди.
Янги эмиссия UZ6056887AI4 коди билан рўйхатдан ўтган бўлиб, давлат компанияси учун тўққизинчи облигациялар чиқарилиши ҳисобланади.
Облигациялар савдоси 30-июн, бугундан бошланади. Компания 700 минг дона облигация чиқарган бўлиб, уларнинг ҳар бири 1 миллион сўм номинал қийматга эга. Эмиссиянинг умумий ҳажми 700 миллиард сўмни ташкил этади. Бу компания тарихидаги энг йирик бир марталик облигация чиқарилиши ҳисобланади.
Қимматли қоғозлар бўйича йиллик даромадлилик 16,5 фоиз этиб белгиланган. Купон тўловлари ҳар уч ойда амалга оширилади. Облигациялар муомала муддати 2555 кун ёки қарийб етти йилни ташкил қилади.
Аввалги натижалар
2024 йилдан буён компания «Тошкент» фонд биржасида жами саккизта корпоратив облигация чиқарилишини амалга оширган. Уларнинг умумий ҳажми 1,49 триллион сўмга етган.
Шунингдек, жорий йил март ойида компания облигациялари бўйича даромадлилик тарихи давомидаги энг паст даража — йиллик 16,5 фоизга тушган эди.
Янги молиялаштириш
Компания ипотека кредитлари билан таъминланган илк ипотека облигацияларини ҳам чиқаришга тайёргарлик кўрмоқда.
Июн ойи бошида Истиқболли лойиҳалар миллий агентлиги 40,5 миллиард сўмлик дастлабки ипотека облигациялари чиқарилишини давлат рўйхатидан ўтказган.
Бундан ташқари, «Европа тикланиш ва тараққиёт банки» «Ўзбекистон ипотекани қайта молиялаштириш компанияси»га 50 миллион доллар миқдорида қарз ажратишини маълум қилган. Ушбу маблағлар ипотека бозорини ривожлантириш ва узоқ муддатли молиялаштириш манбаларини кенгайтиришга йўналтирилиши режалаштирилган.
