Трамп Путинни Украина шаҳарларини ўққа тутишни тўхтатишга кўндирди
Доналд Трампнинг шахсий илтимосига биноан, Россия ҳаддан ташқари совуқ об-ҳаво фонида Киев ва Украинанинг бошқа шаҳарларини ўққа тутишда бир ҳафталик танаффус қилишга рози бўлган.
АҚШ президенти Доналд Трамп Россия президенти Владимир Путинга Украина шаҳарларига зарба беришни вақтинча тўхтатиш илтимоси билан шахсан мурожаат қилди. Бу ҳақда у АҚШ вазирлар маҳкамаси йиғилишида маълум қилди.
«Мен Путиндан бир ҳафта давомида Киев ва турли шаҳарларни ўққа тутмасликни шахсан сўрадим. У рози бўлди», — деди Трамп. Бироқ у ушбу танаффус айнан қайси вақтдан бошланишига аниқлик киритмади.
Америка президенти Россия раҳбарининг бу қадамини «жуда яхши ишора» деб атаган.
Энергетика инфратузилмасига зарбаларни тўхтатиш буюрилган
Кун аввалида Россия ва Украинанинг ҳарбий блогерлари энергетика инфратузилмасига зарба беришни тўхтатиш ҳақида буйруқлар келиб тушгани ҳақида хабар тарқатган эди. Украинанинг Supernova+ канали эса Украина ҳарбийларига ҳам Россия энергетика объектларига ҳужум қилмаслик бўйича кўрсатма берилганини маълум қилди.
Ҳозирча ушбу маълумот Киев ёки Москва томонидан расман тасдиқланмаган. Россия президенти матбуот котиби Дмитрий Песков «энергетик сулҳ» ҳақидаги хабарларга изоҳ беришдан бош тортди.
Абу-Дабидаги музокаралар
Financial Times нашрининг ёзишича, зарбаларни вақтинча тўхтатиш имконияти 23–24 январ кунлари Абу-Дабида АҚШ иштирокида ўтган уч томонлама музокараларда муҳокама қилинган. Гап Украина энергетика инфратузилмасига ҳужумларни тўхтатиш эвазига Киевнинг Россия нефт объектлари ва танкерларига зарба беришдан воз кечиши ҳақида бормоқда.
Аввалги уринишлар ва мораторий тажрибаси
2025 йил декабр ойида Украина президенти Владимир Зеленский шунга ўхшаш келишувни таклиф қилган эди. Ўшанда Кремл вақтинчалик чоралар эмас, балки «узоқ муддатли тинчлик»дан манфаатдор эканини айтиб, таклифни рад этган.
2025 йил баҳорида Доналд Трамп ва Владимир Путин ўртасидаги музокаралардан сўнг энергетика тизимларига зарба бериш бўйича 30 кунлик мораторий жорий қилинган эди. Кейинчалик ушбу келишув бузилган ва томонлар бунда бир-бирларини айблашган.
