2026 йилда катта экранли энг яхши смартфонлар рейтинги эълон қилинди

Машҳур «Tom’s Guide» технологик нашр 2026 йил учун катта экранли смартфонларнинг янгиланган рейтингини эълон қилди. Рўйхатга экран диагонали тахминан 6,7 дюйм ва ундан катта бўлган, видео томоша қилиш, ўйинлар ва иш жараёнлари учун мўлжалланган қурилмалар киритилган.

Рейтингда биринчи ўринни «Samsung» компаниясининг «Galaxy S25 Ultra» модели эгаллади. Мутахассислар ушбу смартфонни универсал флагман деб баҳолади: 6,9 дюймли ёрқин дисплей, юқори иш унумдорлиги ва илғор камералар комбинацияси уни рейтинг пешқадамига айлантирган.

Қурилманинг «S Pen» стилусини қўллаб-қувватлаши эса уни ёзув, эскиз ва ижодий ишлар учун ҳам қулай қилади. Шу жиҳатлари «Galaxy S25 Ultra»ни катта экранли смартфонлар сегментида эталон сифатида кўрсатди.

Энг яхши моделлар

Катта экранли энг яхши «iPhone» сифатида «Apple»нинг «iPhone 17 Pro Max» модели тан олинди. Мутахассислар уни кучли процессор, 48 мегапикселли барча модулларга эга асосий камера тизими ва узоқ автоном иш вақти учун юқори баҳолади.

«Энг яхши нарх ва имкониятлар нисбати» категориясида ғалаба «OnePlus»нинг «OnePlus 15» моделига насиб этди. Смартфон 165 Hz янгиланиш частотали катта экран, қудратли процессор ва синфида энг тез зарядлаш технологияларидан бири билан ажралиб туради.

Катта смартфонлар орасида энг яхши камера сифати билан «Google»нинг «Pixel 10 Pro XL» модели ажралиб чиқди. У сунъий интеллект асосидаги фото ишлов бериш алгоритмлари ва «DxOMark» лабораториясига кўра энг яхши LTPO OLED экран билан жиҳозланган.

Бозор тенденцияси

Мутахассислар алоҳида ҳолда «Samsung»нинг «Galaxy Z Fold 7» моделини ҳам қайд этди. У энг яхши йиғилувчи смартфон сифатида баҳоланиб, кенг иш майдони ҳисобидан планшет ўрнини босиши мумкин.

Экспертлар фикрича, катта экранли смартфонлар 2026 йилда ҳам юқори талабда қолади. Контент истеъмоли, мобил иш ва ўйин сегменти ўсиши фон ида ишлаб чиқарувчилар айнан шу форматга кўпроқ эътибор қаратмоқда.