«Humo» to‘qqiz oyda yarim trillion so‘mdan ortiq sof foyda ko‘rdi
Kompaniyaning sof foydasi yil davomida 2,6 barobar oshib, 586 mlrd 833 mln so‘mga yetdi.
© Ijtimoiy tarmoqlar«Milliy banklararo protsessing markazi» AJ (Humo) 2026-yil uchinchi chorak yakunlari bo‘yicha hisobotini e’lon qildi.
Qayd etilishicha, kompaniyaning to‘qqiz oylik sof foydasi aniq ko‘rsatkichlarda 586 mlrd 833 mln so‘mni tashkil etgan. Bu o‘tgan 2025-yilning mos davriga (223 mlrd 967 mln so‘m) nisbatan 2,6 barobarga ko‘pdir.
Moliyaviy tushumlar va xarajatlar dinamikasi
Kompaniyaning sof tushumi 2,65 barobar oshib, 1 trln 9,4 mlrd so‘mga yetdi. O‘tgan yili bu ko‘rsatkich 380,9 mlrd so‘m bo‘lgan edi. Sotilgan xizmatlar tannarxi esa tushumga nisbatan sekinroq, ya’ni 87,5 foizga o‘sib, 187,2 mlrd so‘mni tashkil qilgan.
Buning natijasida asosiy faoliyatdan olingan yalpi foyda 2,9 barobar o‘sdi va 822,2 mlrd so‘mga yetdi. Tushumdagi yalpi foyda ulushi ham 73,8 foizdan 81,5 foizgacha ko‘tarilgani ma’lum qilindi. Asosiy faoliyatdan olingan foyda 2,85 barobar o‘sib, jami 646 mlrd so‘mni tashkil qildi.
Shu bilan birga, davr xarajatlari ham 2,9 barobar oshib, 176,9 mlrd so‘mga yetganligi ochiqlandi. Xususan, sotish xarajatlari 2,1 mlrd so‘mdan 48,4 mlrd so‘mgacha ko‘paygan. Ma’muriy xarajatlar 70,7 mlrd so‘mni (+96,1 foiz), boshqa operatsion xarajatlar esa 57,7 mlrd so‘mni (2,5 barobar o‘sish) tashkil etgan.
Foyda solig‘i xarajati 5,1 barobar oshib, 73,4 mlrd so‘mga yetgan (o‘tgan yili bu raqam 14,4 mlrd so‘m bo‘lgan). Taqqoslash uchun, birinchi chorakda kompaniya «IT Park» rezidenti sifatida atigi 11,2 mln so‘m foyda solig‘i to‘lagani hisoblangan edi. To‘qqiz oylik natijalarga ko‘ra, samarali soliq stavkasi 6 foizdan 11,1 foizgacha oshgani ko‘rsatib o‘tildi.
Choraklik natijalar va kapital holati
Yarim yillik va choraklik hisobotlar asosida hisoblanganda, faqatgina uchinchi chorakning o‘zida «Humo» taxminan 345,7 mlrd so‘m tushum va 175,9 mlrd so‘m sof foyda ko‘rgan. Birinchi va ikkinchi choraklarda esa sof foyda ko‘rsatkichi taxminan 205 mlrd so‘mdan bo‘lganligi hisob-kitob qilindi.
Kompaniyaning o‘z mablag‘lari 54,1 foizga oshib, 963,9 mlrd so‘mni, taqsimlanmagan foydasi esa 775,3 mlrd so‘mni (+71,3 foiz) tashkil etdi. Ustav kapitali o‘zgarishsiz, 155,4 mlrd so‘mligicha qolgani tasdiqlandi.
Ma’lumot uchun, 2024-yil oxirida davlatga tegishli «Humo» aksiyalarining 100 foizi «Paynet» kompaniyasiga 65 mln dollarga sotilgan.
Eslatib o‘tamiz, avvalroq «Paynet»ning 9 oyida 780,2 mlrd so‘m (taxminan 65 mln dollar) sof foyda olgani haqida xabar berilgandi.
