Коинотдаги «Ўлим булути»: Россия Илон Маскнинг империясини йўқ қилмоқчи

Россия америкалик тадбиркор Илон Маскка тегишли Starlink тизимларига қарши қаратилган сунъий йўлдошларга қарши қурол ишлаб чиқаётгани тахмин қилинмоқда. Бу ҳақда Associated Press (AP) агентлиги НАТОнинг икки давлатига тегишли разведка маълумотларига таяниб хабар берди.

Маълумотларга кўра, мазкур қуролнинг ишлаш принципи Starlink орбиталарида бир вақтнинг ўзида бир нечта сунъий йўлдошни ишдан чиқаришга қодир бўлган, ўлчами бир неча миллиметрли юз минглаб юқори зичликдаги зарар етказувчи элементлардан иборат «булут» ҳосил қилишдан иборат. Ғарб разведка хизматларининг баҳолашича, ушбу ишланмадан мақсад — Ғарбнинг коинотдаги устунлигини, хусусан, жанг майдонида Украинани қўллаб-қувватлаётган Starlink сунъий йўлдошлари фаолиятини чеклашдир.

Шу билан бирга, AP агентлиги бу ҳолатда «бошқа орбитал тизимлар учун ҳалокатли зарар етказиш» хавфи мавжудлигини қайд этди. Таҳлилчиларга кўра, бундай «булут» нафақат Америка, балки Россия ва Хитойнинг ўз сунъий йўлдошларини ҳам йўқ қилиб юбориш хавфи бор.

Secure World Foundation ташкилотининг коинот хавфсизлиги бўйича эксперти Виктория Самсон агар Россия бундай лойиҳага қўл уришга қарор қилган бўлса, бундан «жуда ажабланишини» таъкидлаб, тадқиқотлар «соф экспериментал» характерга эга бўлиши мумкинлигини тахмин қилган.

Канада Қуролли Кучлари коинот бўлинмаси қўмондони, бригада генерали Кристофер Хорнер АҚШнинг Россия коинотда оммавий қирғин қуроли устида ишлаётгани ҳақидаги аввалги айбловларини инобатга олган ҳолда, бундай ишланмаларни «истисно қилиб бўлмаслигини» таъкидлади. «Бундай турдаги тизим ҳақида ҳисоботлар олганман деб айта олмайман. Бироқ, бу ҳақиқатга зид бўлиб ҳам кўринмайди», — дея қўшимча қилди у.

Экспертларнинг фикрича, Москва ушбу қуролни амалда қўлламасдан туриб ҳам рақибларига таҳдид қилиш учун фойдаланиши мумкин. Стратегик ва халқаро тадқиқотлар маркази эксперти Клейтон Своуп буни тийиб туриш учун мўлжалланган «қўрқув қуроли» деб тавсифлади. Шу билан бирга, таҳлилчилар Россиянинг ўз коинот тизимларига етиши мумкин бўлган зарар қуролни амалда қўллаш ёки жойлаштиришга тўсқинлик қилувчи асосий омил бўлишини айтмоқда.

AP агентлиги танишган материалларда тизимни жойлаштириш муддатлари кўрсатилмаган, шунингдек, синовлар ўтказилгани ёки тадқиқотлар қайси босқичда эканлиги айтилмаган. Разведка хулосаларидан хабардор расмий шахснинг сўзларига кўра, тизим ҳозирда «фаол ишлаб чиқиш босқичида».