O‘rta maxsus va kasbiy ta’limda ustozlar maoshi yangi tartibda belgilanadi

Hukumatning «O‘rta maxsus va kasbiy ta’lim tashkilotlari xodimlari mehnatiga haq to‘lashning takomillashtirilgan tizimini joriy etish to‘g‘risida»gi qaror loyihasi regulation.gov.uz muhokamalari portalida joylashtirildi. Hujjatga ko‘ra, 2025 yil 1 sentyabrdan boshlab sohadagi ish haqi tizimi bir necha jihatdan o‘zgarishi belgilangan. Jumladan, kasbiy ta’lim tashkiloti o‘qituvchilarining bazaviy tarif stavkalari umumiy o‘rta ta’lim o‘qituvchilariniki bilan tenglashtiriladi. Akademik litseylardagi ustozlar va yordamchi xodimlar maoshi esa ixtisoslashtirilgan maktablardagi xodimlar bilan bir xil bo‘ladi. Shuningdek, fan nomzodi (PhD), fan doktori (DSc), professor va dotsent unvonlariga ega o‘qituvchilar hamda ishlab chiqarish ta’limi ustalarining ish haqi oliy ta’lim muassasalaridagi katta o‘qituvchilar bilan tenglashtiriladi. Psixologlar va rahbarlar uchun ham yangi me’yorlar joriy etiladi. Xususan, direktor, ijrochi direktor va ularning o‘rinbosarlari uchun bazaviy tarif stavkalari umumiy o‘rta ta’lim muassasalari rahbarlarining maoshi bilan bir xil qilinadi. 2026 yil 1 yanvardan esa KPI — faoliyat samaradorligi ko‘rsatkichlari asosida har oylik ustamalar berilishi rejalashtirilmoqda. Unga ko‘ra, direktorlarga 20 foizgacha, ijrochi direktor va direktor o‘rinbosarlariga esa 10 foizgacha qo‘shimcha haq tayinlanishi mumkin.