«SpaceX» Ukraina iltimosiga ko‘ra, «Starlink» internetini Rossiya dronlari uchun yopdi

Ukraina so‘roviga binoan «SpaceX» kompaniyasi Rossiya qo‘shinlari tomonidan «Starlink» sun’iy yo‘ldosh internetidan foydalanishni chekladi. Bu aloqa zarbali dronlarni boshqarish va Ukraina fuqarolik infratuzilmasiga hujumlarda qo‘llanayotgani qayd etilgan.

«SpaceX» asoschisi Ilon Mask ijtimoiy tarmoqda Ukraina mudofaa vaziri Mixail Fyodorov murojaatiga javoban, «Starlink»dan ruxsatsiz foydalanishni to‘xtatish bo‘yicha ko‘rilgan choralar samara berganini ma’lum qildi. Uning so‘zlariga ko‘ra, Rossiya tomonining sun’iy yo‘ldosh aloqasidan foydalanish imkoniyatlari sezilarli darajada cheklangan.

Mixail Fyodorov ham choralar amalda natija berayotganini tasdiqlab, «SpaceX» bilan hamkorlik davom etishini bildirdi. U keyingi bosqichda yanada keng qamrovli texnik yechimlar ishlab chiqilayotganini ta’kidladi.

Texnik mexanizm

Ma’lumotlarga ko‘ra, cheklovlar to‘liq o‘chirish emas, balki texnik parametrlarni o‘zgartirish orqali amalga oshirilgan. Xususan, zarbali dronlarda qo‘llanayotgan «Starlink» terminallari uchun maksimal ulanish tezligi 75 km/h bilan cheklangan.

Rossiya dronlarining parvoz tezligi 180–270 km/hʼni tashkil etgani sababli, ushbu cheklov aloqa barqaror ishlashini amalda imkonsiz qilib qo‘yadi. Natijada «Starlink» orqali dronlarni masofadan boshqarish samarasini yo‘qotadi.

Ukraina mudofaa vazirligidagi texnologik masalalar bo‘yicha maslahatchi Sergey Beskrestnovning aytishicha, joriy etilgan qaror vaqtinchalik xarakterga ega. Uning so‘zlariga ko‘ra, yanada mustahkam va universal yechimlar ishlab chiqish qo‘shimcha vaqt va muvofiqlashtirishni talab qiladi.

Muammo fonidagi qaror

Muammo 2026 yil yanvar oyi oxirida keskinlashdi. «Urushni o‘rganish instituti» hamda Ukraina harbiylari Rossiya qo‘shinlari zarbali dronlariga «Starlink» terminallari o‘rnatilayotgani haqida ma’lum qilgan edi. Bu dronlar havo mudofaasi tizimlarini chetlab o‘tishda qo‘llanayotgani qayd etilgan.

23-yanvar kuni Mixail Fyodorov Ukraina raqamli texnologiyalar idoralari «SpaceX» bilan zudlik bilan aloqa o‘rnatganini ma’lum qildi. Oradan ikki kun o‘tib, birinchi texnik qarshi choralar joriy etilgani e’lon qilindi.

Ekspertlarning fikricha, mazkur qaror sun’iy yo‘ldosh infratuzilmasining harbiy mojarolarda qo‘llanilishi masalasini yanada keskin kun tartibiga olib chiqmoqda. Kelgusida «Starlink»dan foydalanish qoidalari xalqaro darajada qayta ko‘rib chiqilishi mumkin.