Tojikistonda Starlink sun’iy yo‘ldosh interneti ishga tushdi
Tojikiston Starlink texnologiyalaridan rasman foydalanayotgan Markaziy Osiyodagi ikkinchi davlatga aylandi.
SpaceX kompaniyasining Starlink tarmog‘i Tojikistonning butun hududida yuqori tezlikdagi internet xizmatlarini ko‘rsata boshladi. Signal kechikishi past bo‘lgan tizimning ishga tushirilishi mamlakatning eng chekka va baland tog‘li hududlarini ham aloqa bilan ta’minlash imkonini beradi. Bu haqda Ilon Mask X ijtimoiy tarmog‘ida ma’lum qildi.
Uning aytishicha, bu Tojikiston hukumati va Amerika kompaniyasi o‘rtasida 2025 yil oxirida imzolangan litsenziya kelishuvi natijasida amalga oshirilgan. Hamkorlikning asosiy maqsadi respublikaning borish qiyin bo‘lgan hududlarini keng ko‘lamli raqamlashtirish edi.
«Tojikistonda Starlink yuqori tezlikdagi, past kechikishli internetdan foydalanish imkoniyati paydo bo‘ldi!», - deyiladi Mask xabarida.
Tojikiston mintaqada SpaceX texnologiyalaridan rasman foydalanish imkoniyatiga ega bo‘lgan ikkinchi davlat bo‘ldi. Birinchisi Qozog‘iston bo‘lib, u yerda tarmoq 2025 yil avgustdan beri faoliyat yuritib, chekka qishloq joylardagi turar-joy binolari va ijtimoiy obyektlarni internet bilan ta’minlab kelmoqda.
Starlink ishga tushirilishi kutilayotgan mintaqaning keyingi mamlakati O‘zbekiston bo‘ladi. Tarmoqning O‘zbekiston bozoriga kirishi 2026 yilga rejalashtirilgan. Respublika hukumati allaqachon terminallardan foydalanish qoidalarini belgilab, tegishli imtiyozlarni nazarda tutgan holda me’yoriy va soliq bazasini tayyorlashni yakunladi.
